म्हिगः नं सुनसरीया थीथी थासय् प्रदर्शन : प्रदर्शन हिंसात्मक जुइवं कर्फ्यु आदेश
येँ (नेपालभाषा टाइम्स) – सुनसरीया देवानगञ्जय् वंगु आइवाः जूगु घटना लिपा म्हीग कर्फ्यु आदेशलिसें सेना परिचालन जुइवं नियन्त्रणय् वःगु हिंसात्मक घटना म्हिगः हाकनं तच्वःगु दु । म्हिगः थीथी थासय् जूगु प्रदर्शन हिंसात्मक जुइवं जिल्ला प्रशासन ज्याकू सुनसरीं पूर्वपश्चिम राजमार्ग अन्तर्गत कोशी ब्यारेजनिसें इटहरीया पकलीचोक तक कर्फ्यु आदेश जारी याःगु दु ।
म्हिगः जूगु प्रदर्शनय् नं थीथी थासय् प्रदर्शनकारी व प्रहरी दथुइ ल्वापु जूगु खः । प्रहरीं प्रदर्शनकारीतय्त नियन्त्रणय् कायेत टियर ग्यास कयेकूगु खः । टियर ग्यास कयेकां नं भिड नियन्त्रणय् मवयेवं कर्फ्यु आदेश जारी याःगु खः ।
देवानगञ्ज घटना लिपा प्रदर्शनकारी व सुरक्षाकर्मी दथुइ तनाव अप्वयाः हिंसात्मक अवस्था ब्वलनेवं जिल्ला प्रशासन ज्याकू सुनसरीं म्हिगः ३ः३० ताः इलंनिसें मेगु सुचं जारी मजूतलेया निंतिं कर्फ्यु आदेश जारी याःगु खः । प्रमुख जिल्ला अधिकारी ईश्वरीप्रसाद अर्यालं जारी याःगु आदेशकथं स्थानीय प्रशासन ऐन, २०२८ या दफा ६ (क) कथं सुनसरी जिल्ला दुने लाःगु महेन्द्र राजमार्गया निखेरं प्यंगू किलोमिटर व इनरुवा बजार क्षेत्र दुने वयेवनेगु, मुनेगु, जुलुस पिकायेगु, प्रदर्शन, सभा, बैठक वा घेराउ यायेत निषेध यानातःगु खः ।
प्रशासनं जारी याःगु आदेशकथं कर्फ्यु क्षेत्र पूर्वी सीमा इटहरीया पकलीचोक, पश्चिमय् कोशी ब्यारेजया ताँ, उत्तर–दक्षिणपाखे महेन्द्र राजमार्गनिसें २०० मिटर तापाक क्वःछिउगु खः ।
देवानगञ्ज घटनाया विरोधय् थीथी थासय् प्रदर्शन उग्र जुइवं सार्वजनिक सुरक्षा, शान्ति-सुव्यवस्था व सम्भावित थप अप्रिय घटना मजुइमा धकाः कफ्र्यु आदेश जारी यायेमाःगु खँ जिल्ला प्रशासन ज्याकुथिं धाःगु दु । प्रशासनं सर्वसाधारणयात कफ्र्यु आदेश पूर्ण पालना यायेत व अत्यावश्यक बाहेकया ज्याय् छेँनं पिहां मवयेत इनाप नं याःगु दु ।
आइतवाः चान्हय् देवानगञ्ज–३ कप्तानगञ्जय् निगू पुचः दथुइ जूगु ल्वापु नियन्त्रण कायेगु झ्वलय् प्रहरीं गोलीं कयेकूगु खः । प्रहरीं कयेकूगु गोलीं कयाः ३० दँया ओमप्रकाश मेहता सीगु खः । घटनाय् गोलीं कयाः च्याम्ह घाःपाः जूगु खःसा झिंप्यम्ह प्रहरी नं घाःपाः जूगु दु । घटनाया छानविन यायेत गृह मन्त्रालयं सहसचिवया नेतृत्वय् छानविन समिति नीस्वनाः अनुसन्धान न्ह्याकेधुंकूगु दु ।
सुनसरीया घटनाया बारे गृह मन्त्रालयय् म्हिगः सुरक्षा प्रमुखया उपस्थितइ सहलह याःगु दु । म्हिगःया सहलहय् नेपाल प्रहरीया आईजीपी दानबहादुर कार्की, सशस्त्र प्रहरीया आईजीपी नारायणदत्त पौडेल गृहमन्त्री सुधन गुरुङ, गृहसचिव राजकुमार श्रेष्ठ दथुइ सहलह जूगु खः ।
LEAVE YOUR COMMENTS