ने. सं. ११४६ दिल्लाथ्व चतुर्दशी -

कोशीया मुख्यमन्त्रीपाखें राजीनामा बीत अस्वीकार

येँ (नेपालभाषा टाइम्स) – एमाले व नेकपा दथुइ न्यागू प्रदेशय् न्हूगु सरकार नीस्वनेगु सहमति जूसां कोशी प्रदेशय् न्हूगु सरकार नीस्वनेत थाकुइगु खनेदुगु दु । एमालेपाखें मुख्यमन्त्री जुयाच्वंम्ह हिक्मत कार्कीं राजीनामा बीत तयार मजुइवं थन न्हूगु सरकार नीस्वनेत समस्या जुइगु खनेदुगु खः ।

एमाले अध्यक्ष केपी ओली व नेकपा संयोजक पुष्पकमल दाहाल दथुइ जूगु स्वंगू बुँदाया सहमतिकथं कोशीइ आः नं एमालेया हे नेतृत्वय् सरकार नीस्वनी । तर एमाले अध्यक्ष ओलीं वर्तमान मुख्यमन्त्री कार्कीयात चीकाः संसदीय दलया उपनेता तिलकुमार मेयाङ्बोयात मुख्यमन्त्री दयेकेगु पक्षय् दु । थुकी असन्तुष्टि प्वंकुसें कार्कीं थम्हं राजीनामा मबीगु खँ धयाच्वंगु दु ।

मुख्यमन्त्री कार्कीं थः सुं छम्ह नेताया आदेशं राजीनामा बीत तयार मदु धासें यदि राजीनामा कायेगु खःसा संस्थागत निर्णय जुइमाः धाःगु दु । अथेहे वय्कलं थः संसदीय दलया नेताया हैसियतं मखसे संविधानया उपधारा ५ कथं बहुमत सांसदतय् स्वतन्त्र हस्ताक्षरया आधारय् मुख्यमन्त्री जुयागुलिं थम्हं राजीनामा बिल धाःसा संवैधानिक संकट वइगु खँ नं धयाच्वंगु दु ।

कार्कीं थम्हं राजीनामा मबीगु खँ अध्यक्ष ओलीयात नापलानाः धायेधुंकूगु दु, अथे खःसां ओली धाःसा न्ह्याथे यानाः जूसां कार्कीया राजीनामा कायेगु पक्षय् दु । कार्की पार्टी पुनर्गठन यायेमाः धइगु पक्षयाम्ह खः । उकिं ओली थःगु विरुद्ध लगे जूपिंत सिधयेकेगु कासाय् लगे जुयाच्वंगुलिं नं कार्कीयात न्ह्याथे यानाःसां चीकेत स्वयाच्वंगु दु ।

थ्वहे दथुइ पार्टी उपाध्यक्ष विष्णु पौडेल व महासचिव शंकर पोखरेल प्रदेश सरकार गठन व पार्टी पुनर्गठन प्रतिवेदन बारे सहलहया निंतिं ओलीयात नाप लायेत गुण्डु वंगु दु । अन वय्कःपिंसं प्रदेश कोशी व लुम्बिनीइ आःयापिं मुख्यमन्त्री चीकाः मेम्ह मुख्यमन्त्री दयेकेत्यंगु व बागमति संसदीय दलया नेतायात मुख्यमन्त्री मदयेकुसे मेम्हेसित मुख्यमन्त्री दयेकेत्यंगु खँय् ओलीलिसे खँल्हाबल्हा याःगु खँ धाःगु दु ।

मेखे नेकपाया संयोजक पुष्पकमल दाहालं सहसंयोजक माधव नेपालयात ह्ययेकेत वय्कःया छेँय् हे वंगु दु । म्हिगः सुथय् नेपालया कोटेश्वरस्थित छेँय् वंम्ह दाहालं एमालेलिसे जूगु सहमति व आःया रणनीति बारे खँल्हाबल्हा यानादीगु खः ।