ने. सं. ११४४ कौलाथ्व पारू - नःलास्वनेगु

सिन्धुपाल्चोकया लाखेया इतिहास मालेमाः

येँ – सिन्धुपाल्चोकया लिस्तीइ हुइका वयाच्वंगु लाखे प्याखं दुने नेपाःया इतिहास सुलाच्वंगुलिं थुकिया इतिहास व बाखं मालेमाःगु खँय् विज्ञपिंसं बः बिउगु दु । लिस्तीमाई गुथि सेवा समितिं लाखेप्याखंयात कयाः ग्वसाः ग्वःगु अन्तक्र्रियाय् लाखेप्याखंया हे इतिहास व बाखं मालेमाःगु खँय् बः बिउगु खः ।

गुंलालाखेया रुपय् पिदनीगु थुगु प्याखं मेमेगु थासय् पिदनीगु लाखे प्याखंस्वयां पाःगु खँय् बः बिसें नेवाः देय् दबूया केन्द्रीय दुजः हरिकुमार श्रेष्ठं थुकिया इतिहास मालेफत धाःसा स्थानीय नेवाःतय्त छधी यायेत अझ तिबः जुइ धयादिल । वय्कलं लाखेप्याखनं सिन्धुपाल्चोकया थीथी थासय् न्यनाच्वंपिं नेवाःतय्त सांस्कृतिक रुपं एकिकृत यानातःगु न्ह्यथँसें युवापुस्तां व्यवस्थितरुपं न्ह्याकेफत धाःसा थुगु प्याखं हे सिन्धुपाल्चोकया म्हसीका जुइ धयादिल ।

संस्कृतिविद डा. चुन्दा वज्राचार्यं थौंकन्हय् सिन्धुपाल्चोकया लिस्तीइ हुइकाच्वंगु लाखे प्याखनय् लाखे हे मदुगुलिं थुकिया अनुसन्धान यायेमाःगु खँय् बः बियादिल । वय्कलं न्हापा लाखेया सहभागिता दुगु तर लिपा मदुगुलिं प्याखंया आकर्षण म्हो जूगु खँ न्ह्यथनादिसें थुकी इतिहास सुलाच्वंगु व थ्व प्याखं मात्र मनोरंजनया निंतिं मखसें प्रारम्भिक शाहकालय् नेपाःगालं पितिनाः छ्वःपिं नेवाःतय्गु इतिहास सुलाच्वंगु दु धयादिल ।

उकिं थनया लाखेप्याखंयात कयाः दुग्यंक अनुसन्धान यायेमाःगु खँय् वय्कलं बः बियादिल ।संस्कृतिविद रास जोशीं लाखेप्याखनय् प्रहरी, बुरीम्ह मिसा, मचा व मिस्तय्गु भूमिका दुगु थुगु प्याखं तःकैचं प्रभावित जूपिनिगु बाखं खः धयादिल ।

रणबहादुर शाहया पालय् नेपाःगालं पितिंकाः छ्वःपिं नेवाःतय्सं थःत जूगु पीडाया बाखं लाखेप्याखंमार्फत क्यनाच्वंगु वय्कलं धयादिल ।देशं पितिनाछ्वःपिं नेवाःतय्त लिस्तीमाई व भैरवं संरक्षण बिउगु थुगु प्याखनं क्यना वयाच्वंगु धासें थुगु प्याखंया पूवंक इतिहास च्वयेमाःगु आवश्यक जूगु खँय् वय्कलं बः बियादिल ।

समितिया नायः चमेरे प्रधानं भुखाचं स्यंगु ख्वाःपा पुनःनिर्माण यानाः ल्याय्म्ह पुस्तायात लःल्हायेगु कुतः यानाच्वनागु कनादिल । शेर्पा वस्तीइ च्वंपिं नेवाःतय्सं हुइकाच्वंगु थुगु प्याखंयात दक्व जाति,जनजातिया सदभाव दुगु कनादिसें थ्व प्याखं लिस्तीमाई लागाया म्हसीका खः धयादिल ।

थ्व प्याखं सकसिनं म्वाकेमाः धाःसां न्हिथं न्हना वनाच्वंगु दु धयादिसें थ्व प्याखं न्हना वन धाःसा इतिहासया छगू पाना न्हनी धयादिल ।
ज्याझ्वलय् संस्कृतिविद् एकाराम सिं, टेकबहादुर प्रधान, चक्रबहादुर प्रधान, अमृतबहादुर श्रेष्ठ, रुपेश श्रेष्ठपिंसं नं थःथःगु धापू तयादीगु खः ।