संसदय् निर्दलीयताया अभ्यास याइन
येँ -प्रतिनिधिसभा विघटनयात कयाः संवैधानिक अदालतय् न्ह्यानाच्वंगु मुद्दाय् म्हिगः प्रधानमन्त्री ओली पक्षीइ वकिलतय्गु सुनुवाइ शुरु जुल । म्हिगः सरकारी पक्षपाखें बहस यासें महान्यायाधिवक्ता रमेश बडालं देशय् आः निर्दलीयता लागू यायेत स्वयाच्वंगु द्वपं बियादिल । वय्कलं छगू दलं त्याःपिं सांसदं विपक्षी दलया नेतायात प्रधानमन्त्री दयेकेत स्वयेगु व उकियात कार्यान्वयन यायेत अदालतय् वनेगु गलत जूगु खँ धयादिल ।
वय्कलं धयादिल, ‘छगू दलं निर्वाचित प्रतिनिधिसभाया दुजः विपक्षी दलया सांसदयात प्रधानमन्त्री दयेकेत वन धाःसा निर्दल जुइ खनिं, दल त्याग याःगु जुइ कि छु जुइ, छगू दलं निर्वाचित जुइगु अले प्रतिस्पर्धी दलया नेतायात प्रधानमन्त्री दयेके धायेगु ला ? अले सम्मानित अदालतं कार्यान्वयन याना बी माल धकाः वयेगु पाय्छि जू ला ?’
वय्कलं बहुमतं दल सञ्चालन जुइगु खँ धासें दल दुनेया निर्वाचनय् पराजित जूपिंसं दल सञ्चालन यायेत स्वयाच्वंगु धासें दलया टिकटं निर्वाचित जुयाः वयेधुंकाः बहुमतया निर्णय माने यायेगु तर्क नं यानादीगु दु । अथे हे वय्कलं शेरबहादुर देउवायात प्रधानमन्त्री नियुक्त यायेगु आदेश बिल धाःसा अदालतं राजनीतिइ ल्हाः तःगु ठहरे जुइगु खँ नं धयादिल । वय्कलं संसद विघटन प्रधानमन्त्रीं याःगु मखुसें संविधानतः विघटन जूगु जिकिर यानादिल । वय्कलं सरकारं न्ह्याथेज्याःगु अवस्थाय् नं अदालतया आदेशयात स्वीकार याःगु धासें धयादिल, ‘धारा ७६ (५) सं निगुलिं पक्षया दावी अस्वीकार जुइधुंकाः सुनां विघटन यात ? विद्वान पासापिनिगु कथं ला धारा ७६ (३) या प्रधानमन्त्रीं संसद विघटन याये मफइगु खःसा सदाबहार प्रधानमन्त्री जुइ, अथे जुयाः विघटन बाध्यता जुइ ।’
वय्कलं नेपालय् पुनस्र्थापना जूगु संसदं बांलाःगु लिच्वः बीमफुगु दावी यासें धयादिल, ‘इतिहास स्वयेबलय् संसद पुनस्र्थापना लिपा देय् ट्राय्कय् वल ला ? २०५१ साल लिपा झीसं छु खना, बहुदल प्रति वितृष्णा ब्वलन, पुनस्र्थापना जूगु संसदं परिणाम बीफइ मखु ।’
लिसें वय्कलं प्रतिनिधिसभा विघटनया आःया मुद्दा संवैधानिक इजलासया क्षेत्राधिकार दुने मलाःगु तर्क यासें धयादिल, ‘थ्व मुद्दा संवैधानिक इजलासया क्षेत्रधिकार दुने मलाः, धारा १३७ कथं थ्व मुद्दा संवैधानिक इजलासय् वयेगु निंतिं संघ व प्रदेश दथुइ विवाद व संघ व स्थानीय निकाय दथुइ विवाद जुइमाःगु खः, तर दुर्भाग्य, वय्कःपिं गुगु धारा ज्वनाः थन वःगु दु उगु धारा कथं माग दाबी हे मदु, अदालतयात गुमराहय् तल, १३७ कथं थ्व मुद्दा इजलासय् वयेगु लँपु धइगु १३७ (३) खः, तर अज्याःगु लँपु जुयाः इजलासय् मुद्दा वःगु मदु ।’
LEAVE YOUR COMMENTS