सुर्खेतय् धिमे प्रशिक्षण क्वचाल
येँ(नेपालभाषा टाइम्स)÷कर्णाली प्रदेशया राजधानी सुर्खेतया वीरेन्द्रनगरय् न्ह्यानाच्वंगु हुलाप्याखं व धिमे प्रशिक्षण क्वचाःगु दु । नेवाः देय् दबू सुर्खेत जिल्ला समितिया ग्वसालय् शिक्षा विकास निर्देशनालय कर्णाली प्रदेशया ग्वाहालिइ नीन्हुया उगु प्रशिक्षण जूगु खः ।
समापन ज्याझ्वलय् मूपाहांकथं झायादीम्ह कर्णाली प्रदेशया सामाजिक विकास मन्त्री खड्गबहादुर पोखरेलं देय्या कला, संस्कृति ल्यंका तयेगु ज्याय् नेवाः समुदायया महत्वपूर्ण भूमिका दु धयादिल । मन्त्री पोखरेलं स्वनिगः पिने च्वनाच्वंपिं नेवाः समुदाय नं थःगु भाषा, कला, संस्कृतियात जीवन्त यानातयेगु व उकिया संरक्षण, संवद्र्धन व प्रवद्र्धनया निंतिं न्ह्यचिलाच्वंगु दु धासें कर्णाली प्रदेशया हकय् नेवाः कला, संस्कृतिया उत्थान व प्रवद्र्धनया निंतिं ग्वाहालि यायेत थः न्ह्याबलें तयार दु धयादिल ।
निर्देशनालयया कर्णाली प्रदेशया शाखा अधिकृत झलकप्रसाद कोइरालां निर्देशनालयं बिउगु सीमित बजेट दुने च्वनाः नं महत्वपूर्ण प्रशिक्षण क्वचायेकूगु खँय् लसता प्वंकादिल ।
प्रशिक्षक सुदन मुनिकारं सुर्खेतया नेवाःतय्सं प्रशिक्षण अवधिज्वःछि नीन्हुतक तसकं लगाव बियाः प्रशिक्षण काःगु धासें प्रशिक्षार्थीतय्के खने दुगु लगावं थःअतिकं प्रभावित जूगु खँ कनादिल ।
ज्याझ्वलय् नेवाः देय् दबूया केन्द्रीय न्वकु खगेन्द्र श्रेष्ठ, नेपाल आदिवासी जनजाति महासंघ सुर्खेतया कार्यवाहक अध्यक्ष अशोक राजी, आदिवासी जनजाति महिला महासंघ सुर्खेतया अध्यक्ष वासना गुरुङ, वीरेन्द्रनगर नगरपालिका ७ वडा सदस्य यामनारायण आचार्य, निवर्तमान वडा सदस्य सुरेश मानन्धरं नं नुगःखँ तयादीगु खः ।
समापन ज्याझ्वलय् प्रशिक्षार्थीतय्सं कुमारि, लाखेलिसें थीथी हुलाप्याखं न्ह्यब्वःगु खःसा धिमे बाजंया प्रस्तुति नं बिउगु खः ।
LEAVE YOUR COMMENTS