‘विराटया इतिहास’ सफू विमोचन
ख्वप(नेपालभाषा टाइम्स)÷ ‘विराट नेपालभाषा साहित्य सम्मेलन गुथिया इतिहास’ नांगु सफू पिहांवःगु दु । विराटया पुलांम्ह नायः लोकेन्द्र बज्राचार्यं च्वयादीगु थुगु सफू नेपालभाषा एकेडेमिया भाइस चान्सलर मल्ल के. सुन्दरं विमोचन यानादीगु खः ।
ज्याझ्वलय् डा. चुन्दा बज्राचार्यं इतिहास डिक्स्नरी थें जक मखुसें उकिं राजनीतिक परिवर्तनय् लाकूगु लिच्वःयात नं ध्वाथुइका उल्लेख यायेमाःगु खँ कनादिल ।
विराटया नायः महेन्द्रगोपाल कर्माचार्यया सभापतित्वय् जूगु सभाय् सफूया च्वमि बज्राचार्यं थः २०५० सालय् नेपालभाषा विषयय् एम ए ब्वनाच्वनागु इलय् थेसिस च्वयेगु झ्वलय् विराटया इतिहास च्वयेगु ज्याय् सकसियां ग्वाहालिं पूवंकागुयात आः सफू कथं पिथनेगु ह्वःताः चूलागु कनादिल ।
सफूया समीक्षा यानादिसें वरिष्ठ साहित्यकार डा. योगेन्द्र प्रधानं स्वसःत्या स्वयां अप्व मनूया ज्याखँ व थःगु लुमन्ति ब्वने फइगु उगु ऐतिहासिक दस्तावेज सफू कथं विराटया इतिहास तयार जूगु कनादिल । ज्याझ्वलय् छेँजःपिनि पाखें लोकेन्द्र बज्राचार्यया काय् प्रविन्द्र बज्राचार्यं लसकुस यानादीगु खः ।
LEAVE YOUR COMMENTS