क्यानेडियन नेवाः गुथिया विन्डसर कचा
येँ(नेपालभाषा टाइम्स)- क्यानेडियन नेवाः गुथिया विन्डसर नगर कचा नीस्वंगु दु । ओन्टारियो राज्यया विन्डसरय् गुथिया आः नकतिनि च्वंगु ज्यासना पुचःया मुँज्यां विन्डसर नगर कचा नीस्वनेगु निर्णय याःगु खः ।
गुथिया लय्पतिकं च्वना वयाच्वंगु ज्यासना पुचःया मुँज्या हालय् जक विन्डसर नगरय् च्वंपिं नेवाःतय् ब्वनाः उगु नगरय् मुँज्या च्वंगु खः । मुँज्याया झ्वलय् गुथिया कचा नं नीस्वंगु खःसा गुम्हेसिया तदर्थ समिति नं गठन याःगु दु ।
गुथिया ज्यासना पुचःयात लसकुस यानादिसें स्थानीय समाजसेवी दिनेश सिंह मल्लं टोरन्टोनिसें विन्डसर नगर तक यात्रा यानाः गुथिया मुँज्या च्वनेत वःगुलिं लसता प्वंकादिसें गुथिया ज्यासना पुचःप्रति आभार प्वंकादिल । लिसें गुथिया ग्वाहालिइ विन्डसर नगरय् नं नेवाः भाय्, कला, संस्कृतिया प्रवद्र्धन व ‘नेवाः नसा नखः’ यायेगु इच्छा यानादिसें थुकिं नेवाः संस्कृतिया प्रचारय् तिबः जुइगु विश्वास प्वंकादिल ।
विन्डसरया नेवाः समुदायया अग्रज नविन रंजितं कला, संस्कृतिया संरक्षण यायेत दकलय् न्हापां नेवाः भाय्यात जीवन्त याना तयेमाःगु खँय् बः बियादिसें ‘भाषा म्वाःसा जाति म्वाइ’ धइगु महाकवि सिद्धिदास महाजुया धापूयात सार्थक ययेत नेपालभाषाया कक्षा संचालन यायेमाःगु खँय् बः बियादिल ।
गुथिया नायः प्रकाश प्रधानाङ्गं गुथिया लय् मुँज्यां यइपुसे च्वंगु विन्डसर नगरय् च्वने खंगुलिं लसता प्वंकादिसें ग्वसाः खलःयात सुभाय् देछानादिल । गुथिया न्वकु उत्तम माकःजुं नेवाः संस्कृतिया अद्वितीय पक्षयात कयाः कुलादिसें उकिया प्रचार प्रसारलिसें संरक्षण व प्रवद्र्धनया निंतिं सकलें छप्पँ जुयाः न्ह्यचिलेमाःगु खँय् बः बियादिल ।
गुथिया मूछ्याञ्जे विमलमान श्रेष्ठं गुथिं याना वयाच्वंगु नियमति व वइगु दिनय् यायेगु ज्याझ्वःया बारे जानकारी बियादिसें विन्डसरय् गुथिया कचा नीस्वनेगु ज्यां गुथिया महत्व अप्वःगु खँ कनादिल । लिसें लय् मुँज्या च्वनेत ह्वःताः बियादीगुलिं ग्वसाः खलःयात सुभाय् नं देछानादिल ।
मुँज्या लिपा सकलें पाहांपिंत परम्परागत नेवाः नसा ज्वलंया समय्बजि नकेगु ज्या जूगु खः । नापं उगु इलय् नेवाः म्येँ, संगीत, हुलाप्याखं व बाजंया प्रस्तुति नं बिउगु खः । विन्डसर नगर टोरन्टों ३७० किमि तापाःगु ओन्टारियोया दक्षिण पश्चिमय् लाःगु सहर खः ।
LEAVE YOUR COMMENTS