शुभ अभियानं न्याम्ह मिसापिंत हन

येँ(नेपालभाषा टाइम्स)- शुभ अभियान मिडियापाखें थीथी ख्यलय् योगदान बियादीपिं न्याम्ह मिसापिंत छगू ज्याझ्वःया दथुइ हनेज्या याःगु दु । अजिमा द्यःया जात्रा याइगु पाहांचः¥हे नखःया लसताय् लाकाः उकथं थीथी न्यागू ख्यलय् थःगु योगदान बियादीपिं मिसापिंत हनेज्या याःगु खः ।

मिडियाया संचालक प्रेरणा शाक्यया सभापतित्वय् जूगु ज्याझ्वलय् मूपाहांकथं श्रद्धाकीर्ति विहारया प्रमुख श्रद्धेय अनागरिका श्रद्धाचारी गुरुमां मूपाहांकथं बिज्याःगु खः । मिडियाया संचालकलिसें ज्याझ्वःया सभापति शाक्यं लसकुस यानादीगु ज्याझ्वलय् राज्यलक्ष्मी शाक्य (संचार), लोचनतारा तुलाधर (साहित्य), विद्या चित्रकार (शिक्षा), गिता गुरुङ (पर्यटन) व दिलकुमारी डंगोल (स्वास्थ्य)यात हनेज्या याःगु खः । ज्याझ्वलय् वय्कःपिंत मूपाहां श्रद्धाचारी गुरुमां नं हनापौ देछानादीगु खःसा विशेष पाहां बागमति प्रदेश सांसद हरिप्रभा खड्गी श्रेष्ठ खादा क्वखायेकादीगु खः ।

ज्याझ्वलय् मूपाहांलिसें विशेषपाहां प्रदेश सांसद श्रेष्ठलिसें प्रदेश सांसद शैलेन्द्रमान वज्राचार्य, पुलांम्ह सांसद जीवन डंगोल, नेवाः पत्रकार राष्ट्रिय दबूया नायः नृपेन्द्रलाल श्रेष्ठ अभिनन्दित व्यक्तित्वपिंसं नुगःखँ तयादीगु खः ।

उगु हे ज्याझ्वलय् शुभ अभियान मिडियाया संचालक शाक्ययात नं हनेज्या याःगु खः । ज्याझ्वलय् सभापति शाक्यं मूपाहांलिसें थीथीकथं ग्वाहालि यानादीपिं मतिनाया चिं नं लःल्हाःगु खः ।