सेल्फ आइसोलेसनय् मच्वनीपिंत जरिवाना

एजेन्सी – बेलायत सरकारं ‘सेल्फ आइसोलेसन’ मच्वनीपिंत जरिवाना याइगु जूगु दु। देशय् कोरोना संक्रमितया ल्याः लगातार रुपं अप्वया वनेवं बेलायत सरकारं उकथंया नियम लागू यायेत्यंगु खः ।

बेलायत सरकारं सेल्फ आइसोलेसनय् मच्वनीपिं थःगु देय्या नागरिकयात १० द्वः पाउण्ड तक जरिवाना याये फइगु कडा नियम लागू यायेत्यंगु खः । बेलायती प्रधानमन्त्री बोरिस जोन्सनं स्वास्थ्य मापदण्डय् न्हूगु व्यवस्था जूगु घोषणा यासें स्वास्थ्य मापदण्ड पालना याःसा हे जक कोरोनापाखें बचे जुइगु अचुक उपाय जूगु धासें उकथंया नियम लागू यायेत्यनागु संचारमाध्यमयात धाःगु दु ।

बेलायत सरकारया न्हूगु घोषणालिसें सेप्टेम्बर २८ तारिख लिपा कोरोना संक्रमितच व संक्रमितया सम्पर्कय् वःपिं व्यक्ति सेल्फ आइसोलेसनय्च्व नेमाःगु जूगु दु। बेलायत सरकारं घोषणा याःगु न्हूकथंया स्वास्थ्य मापदण्ड सेल्फ आइसोलेसनय् च्वनेत अस्वीकार याइपिं व बेवास्ता याइपिंसं न्यूनतम द्वःछि पाउण्ड जरिवाना याइगु जूगु दु। यदि तःक्वः तःक्वः उगु नियमयात हाचां गाल धाःसा जरिवाना अप्वयेकाः १० हजार पाउण्ड तक जरिवाना याइ ।

थ्व हे झ्वलय् बेलायत सरकारं म्हो जक आयश्रोत दुपिंत ५०० पाउण्डया आर्थिक ग्वाहालि बीगु जूगु दु। अथे हे आइसोलेसनय् च्वनेमाःपिं संक्रमितयात ज्याय् तइपिं रोजगारदाता कम्पनीयात नं कारवाही याइगु जूगु दु ।