जेठ निसें वालय् निन्हु बिदा
येँ (नेपालभाषा टाइम्स)÷सरकारं आः वालय् निन्हु सार्वजनिक बिदा बीगु निर्णय याःगु दु । मन्त्रिपरिषदया वंगु मंगलवाः च्वंगु बैठकं आवंलि वालय् निन्हु सार्वजनिक विदा बीगु निर्णय याःगु खः ।रकारं थ्वहे वइगु जेठ १ गते निसें लागू जुइ कथं थ्व व्यवस्था याःगु खः । न्हूगु व्यवस्था कथं आः सुथय् ९ः३० निसें ज्याकू शुरु जुयाः बहनी ५ः३० बजे तक कार्यालय चाली ।
सञ्चारमन्त्री ज्ञानेन्द्रबहादुर कार्कीं आःयात परीक्षणया नितिं कार्यालय ई अप्वयेकाः शनिवाः व आइतवाः सार्वजनिक विदा बीगु निर्णय जूगु जानकारी बियादीगु दु । विदेशी मुद्रा सञ्चिति म्हो जुया वनाच्वंगु व
शोधान्तर घाटा अप्वयाः अर्थतन्त्रय् जोखिम खने दया वयेवं उकियात नियन्त्रण यायेगु उपाय कथं सरकारं सार्वजनिक बिदा अप्वयेकेगु निर्णय याःगु खः । उकथं हे सरकारं विद्यालय व क्याम्पसय् नं शनिवाः व आइतवाः निन्हुयंकं विदा बीगु जूगु दु । शिक्षा मन्त्री देवेन्द्र पौडेलं विद्यालय व क्याम्पसय् निन्हु विदा जुइगु जानकारी बियादीगु खः ।
मन्त्री पौडेलं विद्यार्थीया ब्वनेज्याय् लिच्वः मलायेमा धकाः मेमेगु सार्वजनिक विदा धाःसा कटौती यायेगु आः गुकथं कक्षा सञ्चालन यायेगु धइगु बारे मन्त्रालयं कार्ययोजना दयेकाच्वंगु खँ कनादीगु दु ।
सरकारं पेट्रोलियम पदार्थ आयात म्हो यानाः विदेशी विनिमय सञ्चिति अप्वयेकेत थीथी झिगू वस्तुया आयातय् पूर्ण रुपय् बन्देज तयेगु निर्णय नं याःगु दु । उद्योग वाणिज्य तथा आपूर्ति मन्त्रालयं राजपत्रय् सुचं पिथँसें अय्लाः, मोबाइल, कुरकुरे, टिभी, मोबाइल, सूर्तीजन्य वस्तु लगायतया झिताजि वस्तु आयातय् प्रतिबन्ध तःगु खः । विलासी वस्तुया आयातय् तयातःगु प्रतिबन्ध मेगु असार तक जारी हे जुइगु खँ धाःगु दु ।
उकथं हे औद्योगिक कच्चा पदार्थ बाहेक जिप, कार, भ्यान व २५० सीसी स्वयां अप्वः क्षमताया मोटरसाइकल, फुक्क कथंया न्ह्यवःसा व तास आयातय् नं बन्देज तःगु खः ।
पिनें वइगु विदेशी मुद्रा कम जुइगु तर पिहां वइगु मात्रा धाःसा अप्वःगु कारणं सरकारं थुकथं आयातय् प्रतिबन्ध तयेगु ज्या याःगु खः ।
LEAVE YOUR COMMENTS