जापानय् रञ्जनाया प्रचार

अन्तर्राष्ट्रिय लिपि सम्मेलनय् रञ्जना बारे न्हापांखुसी चर्चा

येँ – थौंकन्हय् देय्या थीथी थासय् कलात्मक आखः च्वयाः प्रचार जुयाच्वंगु रञ्जना लिपि जापानय् जूगु विश्व क्यालिग्राफी सम्मेलनय् सकस्यां तारिफया विषय जूगु दु । जापानय् नकतिनि क्वचाःगु विश्वया थीथी आखःया क्यालिग्राफी याइपिनि सम्मेलनय् नेपाःपाखें ब्वति काः वंपिं आनन्दकुमार महर्जन व सुनिता डंगोलं रञ्जना लिपि बारे थःपिनि प्रस्तुतीकरण यानादीगु खः ।

वय्कःपिंसं रञ्जना लिपिया कलात्मक पक्ष, थुकिया महत्व, थ्व आखः च्वयेगु तरिका व थौंकन्हय् ल्याय्म्हतय् दथुइ जुयाच्वंगु रञ्जना लिपिया पुनर्जागरण बारे अन चर्चा यानादीगु खः ।वय्कःपिनि प्रस्तुतीकरण लिपा अन ब्वति काः वयाच्वंपिं आपालं सहभागीतय्सं थ्व बारे सीके खनाः लसता प्वंकूगु खः ।

ज्याझ्वः प्यन्हु तक जूगु खःसा नेपाःया प्रतिनिधिपिंसं खालीगु इलय् अन वयाच्वंपिं विदेशी सहभागीतय्गु नां रञ्जना लिपिं च्वयाः इना बीगु, रञ्जना आखः च्वयातःगु ब्याग, कप आदि उपहार बीगु ज्या यानादीगु खः । विदेशीत नापलायेगु झ्वलय् वय्कःपिंसं आः रञ्जना लिपियात युनिकोडय् यंकेमाःगु आवश्यकता बारे कँसें थुकिया बारे पहल याना बीत नं सकसितं इनाप यानादीगु खः ।

थज्याःगु अन्तर्राष्ट्रिय सम्मेलनय् रञ्जना लिपि बारे थथे चर्चा जूगु थ्वहे न्हापांखुसी खः । थ्व लिपियात सहभागीत आपाःसिनं प्रशंसा याःगु खँ सुनिता महर्जनं ‘नेपालभाषा टाइम्स’ यात कनादिल ।

सम्बन्धित बुखँ

LEAVE YOUR COMMENTS