बौद्ध संस्कार कथं ओलीया बुन्हि

येँ (नेपालभाषा टाइम्स)- नेकपा (एमाले) या अध्यक्ष केपी ओलीया ७२ दँ बुन्हि म्हिगः मुक्कं बौद्ध संस्कार कथं हनेगु ज्या जुल । ओली निवास बालकोटय् जूगु उगु ज्याझ्वलय् श्रद्धेय धम्मावती गुरुमांलिसें थेरवादी, महायानी व वज्रयानी समेत यानाः करिब ९० म्ह भिक्षु व गुर्जुपिनि उपस्थिति दुगु खः ।

वसपोलपिंसं अन बुद्ध पुजा लिसें पाठ नं यानाबिज्याःगु खःसा अध्यक्ष ओली व वय्कःया जहान राधिका शाक्यपिंसं दान प्रदान नं यानादीगु खः । ज्याझ्वः जहान राधिका शाक्यया हे पहलय् जूगु खः ।

उगु हे ज्याझ्वलय् नांजाःम्ह परराष्ट्रविद् हिरण्यलाल श्रेष्ठया न्हूगु सफू ‘नेपाः–बंगलादेश बौद्ध सम्बन्ध’ नं अध्यक्ष ओलीं विमोचन यानादीगु खः ।
उगु हे ज्याझ्वलय् न्ववासें अध्यक्ष ओलीं वर्तमान सरकारं फागुन १ गते जनयुद्ध दिवसया विदा बियाः हिंसाया न्हियात स्थापित यायेत स्वःगु द्वपं बियादिल । देशय् हिंसात्मक आन्दोलन बन्द जूसां हिंसाया धङधङी धाःसा अझ नं ल्यं दनि धासें वय्कलं फागुन १ गते बिउगु बिदां उकिया संकेत याइगु बिचाः नं तयादिल । ओलीया थ्व धापुतिं वर्तमान सरकारप्रति वय्कःया असन्तुष्टी प्रकट जूगु खँ धयाहःगु दु ।

ज्याझ्वलय् येँ मनपाया उपमेयर सुनिता डंगोल लिसें राधिका शाक्यया छेँजःपिं व पत्रकारतय् उपस्थिति दुगु खः ।