
येँ – थीथी देशं नेपालय् रेमिटेन्स दुहां वइगु क्रम अप्वःगु दु । चालु आर्थिक दँया न्हापांगु महिनाय् जक ७३ अर्ब ९५ करोड तका रेमिटेन्स दुहां वःगु तथ्यांक सार्वजनिक दु । नेपाल राष्ट्र बैंकया कथं बैकिङ प्रक्रियाय् ध्यबा दुहां वःगुलिं रेमिटेन्स दुहां वइगु अप्वःगु खः । वंगु निलाया दुने विशेष यानाः जापान, अष्टे«लिया कोरिया आदि देशं वइगु ध्यबा औपचारिक माध्यमं दुहां वयाच्वंगु दु ।
वंगु साउन महिनाय् जक ३३ प्रतिशत अप्वः रेमिटेन्स दुहां वःगु खः । लिसें नेपाःमित ज्या याः वनाच्वंगु अरब देशय् कच्चा चिकंया भाः थहां वंगुलिं उकिं यानाः ज्याला अप्वःगु कारणं यानाः नं रेमिटेन्स दुहां वयेत ग्वाहालि जूगु खँ धाःगु दु । न्हापा न्हापा विकसित देशं वइगु ध्यबा हुन्डी मार्फत वइगु खःसा थौंकन्हय् बैकिङ च्यानलपाखें वयेगु क्रम अप्वःगुलिं रेमिटेन्सया ध्यबा अप्वः खने दुगु खँ धाःगु दु ।
औपचारिक माध्यमं दकलय् अप्वः रेमिटेन्स दुहां वइगु देश भारत जुयाच्वंगु दु । लिसें थौंकन्हय् डलरया भाः थहां वनाच्वंगुलिं आपालं नेपाःमितय्सं थःगु कम्पनीइ अग्रिम तलब कयाः ध्यबा छ्वया हयेगु यानाच्वंगुलिं नं रेमिटेन्स अप्वः दुहां वःगु अनुमान याःगु दु । विदेशय् डलरय् काःगु ध्यबा नेपालय् वयाः हिलीबलय् अप्वः ध्यबा ल्हातय् लाइगु जुयाः उमिसं न्हापा हे पेश्की तलब कयाः नेपाः छ्वयेगु याइगु खः ।
वंगु आर्थिक दँय् मुक्कं ७ खर्ब ५५ अर्ब ६ करोड तका रेमिटेन्स दुहां वःगु खः । उकी दकलय् अप्वः भारतया १३.३७ प्रतिशत दु । अथेहे मेमेगु झिंप्यंगू देय्पाखें ५ खर्ब १ अर्ब तका दुहां वःगु दु ।
LEAVE YOUR COMMENTS