येँ – प्रधानमन्त्री केपी शर्मा ओली व नेपाः सरकारया मन्त्रीतय् दथुइ जूगु भिडियो टेलि कन्फरेन्सया विवादय् न्हूगु ट्विस्ट वःगु दु। वंगु सोमवाः प्रधानमन्त्री व मन्त्रीतय् दथुइ मन्त्रिपरिषद्या बैठक च्वंगु धाःगु खःसां म्हिगः सञ्चारमन्त्री गोकुल बास्कोटां उगु बैठकयात क्याबिनेट बैठक मखुसें ‘भिडियो टेलिकन्फरेन्स मार्फत सामान्य हाईहल्लो जक जूगु’ धायेवं थ्व ट्विस्ट वःगु खः ।
भिडियो टेलिकन्फरेन्सया झ्वलय् जूगु प्रम ओलीया सम्बोधनयात स्वयेगु खःसा उकी सामान्य हाईहल्लो जक जूगु मखु धइगु सीदुगु दावी जूगु दु। भिडियो टेलिकन्फरेन्स लिपा प्रधानमन्त्री ओलीं छगू ट्विट यासें ‘प्रविधि व प्राविधिकयात सुभाय् बी बीमाः । थौं न्हापांखुसी सिंगापुरं टेलिप्रिजेन्सपाखें मन्त्रिपरिषद्या बैठक च्वने फत । मन्त्रिपरिषदया फुक्कं पासापिंत सुभाय् ! प्रधानमन्त्री व मन्त्रिपरिषद सचिवालयया ग्वाहालि याःपिं सकसितं सुभाय्’ धयादीगु खः ।
उगु भिडियो टेलिकन्फरेन्सयात कयाः प्रधानमन्त्री जक मखु, प्रधानमन्त्रीया प्रमुख राजनीतिक सल्लाहकार बिष्णु रिमालं नं मेगु ट्विट यात । प्रधानमन्त्री व मन्त्रीतय् दथुइ भिडियो सम्वाद जुयाच्वंगु इलय् रिमालं ट्विटरय् च्वल, ‘सिंगापुरंनिसें येँ न्हापांखुसी टेलिकन्फरेन्सपाखें मन्त्रिपरिषदया बैठक च्वन ।’
तर सञ्चार मन्त्रीं धाःसा उकियात थम्हं भिडियो कन्फरेन्स मधयागु धकाः स्पष्ट यानादीगु दु। भिडियो कन्फरेन्सयात मन्त्रिपरिषद् बैठक माने मयाःगुया लिउने छगू कानुनी आधार दु। राष्ट्रपति कार्यालयं प्रधानमन्त्री ओलीया अनुपस्थितिइ उपप्रधानमन्त्री ईश्वर पोखरेलयात कार्यवाहक प्रधानमन्त्रीया जिम्मेवारी लिखित रुपय् बीधुंकूगु दु। उगु लिखत कथं प्रधानमन्त्री सिंगापुरं लिहां मवःतले मन्त्रिपरिषद् बैठकया अध्यक्षता पोखरेलं हे यायेमाः ।
सिंगापुरं प्रधानमन्त्री ओलीं मन्त्रिपरिषदया बैठक हे तःगु खःसां नं उगु बैठक अवैधानिक जुइ । यदि उगु बैठकयात वैधानिकता बीगु खःसा बैठक च्वने न्ह्यः राष्ट्रपति कार्यालयं बिउगु भाला भिंकेमाःगु अवस्था वइ । उगु व्यहोराय् ‘विदेशं भिडियो कन्फरेन्स बैठक च्वनेगु इलय् बाहेक मेगु इलय् प्रधानमन्त्रीया कार्यभार उपप्रधानमन्त्रीं व्यहोरे याइ’ धइगु भाषा तयेमाः ।
खय्त ला थ्व स्वयां न्ह्यः प्रम ओली सहित च्वंगु क्याबिनेटं हे प्रधानमन्त्री विदेशय् दुगु इलय् भिडियोपाखें मन्त्रिपरिषदया बैठक च्वने फइ कथं कार्यसम्पादन नियमावली परिमार्जन यायेधुंकूगु खः । उकिया हे आधारय् प्रम ओलीं सिंगापुरं हे क्याबिनेट बैठक तये फइगु खः । तर अथे यायेगु निंतिं नं सरकारं राष्ट्रपति ज्याकूयात पौच्वयेगु झ्वलय् हे ‘विदेशं भिडियो कन्फरेन्स याःगु इलय् बाहेक उपप्रधानमन्त्रीयाके कार्यभार दइ’ धइगु व्यहोरा च्वयेमाःगु खः । उगु व्यहोरा मदुगुलिं सिंगापुर व येँय् च्वनाः जूगु मन्त्रिपरिषद्या बैठक बारे ट्विस्ट जूगु खः ।
LEAVE YOUR COMMENTS