दलया नेतां चीकेत ओलीया हाथ्या

येँ – प्रधानमन्त्री केपी शर्मा ओलीं थःत संसदीय दलया नेतापाखें विधिसम्मत रुपं चीकेत दाहाल–नेपाल पुचःयात हाथ्या बियादीगु दु । म्हिगः पोखराय् नेकपा ओली पुचःया कार्यकर्तायात सम्बोधन यायेगु ज्याझ्वलय् वय्कलं उगु खँ धयादीगु खः । थःगु सम्बोधनया झ्वलय् वय्कलं धयादिल, ‘विधिवत रुपं नाप लाये, बैठक सःताबी, झासँ ले !’

विधि व पद्धति कथं थःत चीकल धाःसा थः प्रतिपक्षय् च्वनेत तयार दु धासें वय्कलं धयादिल, ‘दत्या प्रतिपक्षय् च्वनेधुंकाः हाकनं निगू तिहाइ हयेगु जुइ ।’ प्रम ओलीं प्रधानमन्त्री पद सुयातं गःतां ज्वनाः दइगु मखु धासें विधि व पद्धतिं वयेत इनाप यानादिल । वय्कलं न्ह्यसः तयादिल, ‘अविश्वासया प्रस्ताव तयाः चीकेगु मखु, गःतां ज्वनाः ….? प्रधानमन्त्रीया चीकेगु लोकतान्त्रिक विधि पद्धति गज्याःगु जुइ ?’

प्रम ओलीं सम्बोधनया झ्वलय् दाहाल–नेपाल पुचःयाके बहुमत दुगु खँ स्वीकार यासें थम्हं पार्टी एकताया निंति बियागु बहुमत आः वयाः गलत रुपं छ्यःगु द्वपं नं बियादिल । प्रम ओलीं धयादिल, ‘व बहुमत जिं हे बियागु खः । पार्टी एकताया निंतिं धकाः बियागु खः । महाधिवेशन ल्यःगु खः लाः ? चुनाव ल्वानाः वःगु कमिटी खः ला ? पार्टी एकता व देश दयेकेगु निंतिं बिउगु खः ।’

वय्कलं दाहाल–नेपाल पुचःया केन्द्रीय दुजःपिंत माल धाःसा थम्हं चीके फइगु खँ धयादिसें धयादिल, ‘नियुक्ति बीम्हेस्या बदर नं याये फइ, छुं न्हि न्ह्यः संसदीय दलया मुख्य सचेतकं देवप्रसाद गुरुङयात चीका बियाः, जिं हयागु खः, जिं हे चीका बिया ।’ प्रम ओलीं दाहाल–नेपाल पुचलं बहुमतया दावी याःसां नं उकिया पुष्टि मजूगु खँ धयादीगु दु, ‘कार्की ब्यांकेटय् भ्वय् नःवःपिंत जिमिगु पक्षय् थुलि मनू दु धयां जी ला ? अध्यक्षं सःतूगु बैठकय्, महासचिवं बैठकय् वःसा जक उकिया पुष्टि जुइ ।’