लामिछानेविरुद्ध कांग्रेस कन्हयनिसें आन्दोलनय्

येँ (नेपालभाषा टाइम्स)÷ नेपाली कांग्रेसं उपप्रधान लिसे गृहमन्त्री रवि लामिछानेयात सहकारी ठगी मामिलाय् संसदीय छानविन समिति नीस्वनाः छानबिन यायेमाःगु माग यासें कन्हय् निसें आन्दोलनया याइगु जूगु दु । कांग्रेसया म्हिगः च्वंगु केन्द्रीय कार्यसमिति व संसदीय दलया मंकाः बैठकं आन्दोलनया घोषणा याःगु खः ।

कांग्रेसं सहकारीया ध्यबा अपचलन याःगु द्वपं फयाच्वंम्ह गृहमन्त्री लामिछानें थः गृहमन्त्री जुइधुंकाः थःत कयाः जुयाच्वंगु अनुसन्धान दिकाः प्रमाण नष्ट यायेत भूमिका म्हितूगु धासें संसदीय छानबिन यायेमाःगु माग याना वयाच्वंगु खः । कांग्रेसं वंगु अधिवेशन निसें हे संसदीय छानबिन समिति नीस्वनेमाःगु माग याना संसद अवरुद्ध याना वयाच्वंगु खः । तर उकियात सरकारं बेवास्ता याना वयाच्वंगु खःसा संसद्य् कांग्रेसया अवरोध दथुइ हे प्रधानमन्त्री पुष्पकमल दाहालं विश्वासया मत काःगु खः ।

कांग्रेसं सरकार अधिनायकवादपाखे उन्मुख जूगु; संविधान, लोकतन्त्र, मानव अधिकार, प्रेस स्वतन्त्रता, जनताया शान्ति सुरक्षा व सुशासन कायम याइगु ज्याय् हाथ्यां जाःगु अवस्था दुगु इलय् गृहमन्त्रीं स्वतन्त्र प्रेसयात ब्वला सायेगु ज्या याःगु धासें उकिया विरुद्ध नं कांग्रेसं सतकय् प्रदर्शन यायेत्यंगु खः ।

आन्दोलनया झ्वलय् कांग्रेसं स्थानीय तहतक सरकारया ज्याया भण्डाफोर यायेगु नं धाःगु दु । थ्वहे झ्वलय् पत्रकारतय् छगू पुचलं गृहमन्त्री लामिछानें सत्ताया दुरुपयोग यानाः थःत अभियोजन व मुद्दा तइगु ज्याय् पंगः थनाच्वंगु धासें निष्पक्ष छानबिन व अभियोजनाया वातावरण दयेकेत सरकारया ध्यानाकर्षण याकूगु दु । म्हिगः थीथी पत्रिकाया स्वीछम्ह सम्पादकतय्सं न्यागू बुँदे मंकाः पौ प्रधानमन्त्रीयात छ्वयाः छानबिन यायेमाःगु माग याःगु खः ।

उकथं हे नेपाल बार एसोसिएसनं नागरिकया अभिव्यक्ति स्वतन्त्रता व आलोचनाया मू स्रोतया रुपय् दुगु पत्रकारितायाता प्रहार यायेगु धयागु लोकतन्त्रय् हे प्रहार जूगु निष्कर्ष पिकाःगु दु । नेपाल बार एशोसियसनं कान्तिपुर मिडिया ग्रुपया अध्यक्ष कैलाश सिरोहियायात ज्वंगु खँय् विरोध यासें अभिव्यक्ति स्वतन्त्रतायात बन्देज याइगु मनसायपाखें जुइगु राज्य शक्तिया दुरुपयोगु स्वीकार्य मजूगु खँ धाःगु दु । उकथं हे नेकपा एकीकृत समाजवादीया अध्यक्ष माधव नेपाल, जनता समाजवादी पार्टी नेपालया अध्यक्ष उपेन्द्र यादवं
नं म्हिगः छगू विज्ञप्ति जारी यासें कान्तिपुरया अध्यक्ष सिरोहियायात ज्वंगु खँय् विरोध प्वंकूगु दु ।

 

सम्बन्धित बुखँ

LEAVE YOUR COMMENTS