फ्रान्सय् सरकार विरुद्ध प्रदर्शन तच्वल

पेरिस – फ्रान्सया राजधानी पेरिसय् भेला जूपिं द्वलंद्वः प्रदर्शनकारीतय्सं राष्ट्रपति इम्यानुएल म्याक्रों विरुद्ध प्रदर्शन याःगु दु । म्हासुगु वसः पुनाः विरोध प्रदर्शनय् कुहां वःपिं इमिसं राष्ट्रपति विरुद्ध तच्वकं नारा नं लगे याःगु खः । लिसें इमिसं राष्ट्रपति म्याक्रोंया राजीनामा नं माग याःगु दु ।

सरकारं पेट्रोलियम पदार्थय् याःगु मूल्यवृद्धिया विरोधय् फ्रान्सय् ताःई न्ह्यवंनिसें उकथंया विरोध प्रदर्शन जुया वयाच्वंगु खः । प्रदर्शनया हे झ्वलय् सछि स्वयां अप्वःसित ज्वना यंकूगु दु । मूल्यवृद्धिया विरोधय् जुयाच्वंगु प्रदर्शनयात सरकारं चिउताः मक्यंगु धासें इमिसं आन्दोलनयात अझ तच्वयेका यंकेगु ख्याच्वः नं बिउगु दु ।

प्रहरी प्रदर्शनयात नियन्त्रणय् कायेत रबर गोलीं कयेकूगु दुसा टियर ग्यास नं प्रहार याःगु दु । गुकिं यानाः सलंसःया ल्याखय् प्रर्दशनकारी घाःपाः जूगु समाचारय् न्ह्यथनातःगु दु । आतक राजधानी पेरिसयात जक केन्द्रीत यानाः विरोध प्रदर्शन याना वयाच्वंपिं प्रदर्शनकारीतय्सं सरकारं थःपिनिगु सःयात वास्ता मयात धाःसा आः मेगु सहर बोर्देएक्स व ताउलोसय् नं छक्वलं प्रदर्शन यायेगु ख्याच्वः बिउगु दु ।

फ्रान्सय् थुकथं मूल्यवृद्धियात कयाः सरकार विरुद्ध जुयाच्वंगु प्रदर्शन थ्व गुक्वःगु चरणया खःसा लिपांगु इलय् प्रदर्शनकारीतय् ल्याः नं अप्वया वनाच्वंगु दु । प्रदर्शनं अप्रिय व हिंसात्मक रुप मकायेमा धकाः च्याद्वः स्वयां अप्वः सुरक्षाकर्मि परिचालन यानातःगु दु ।