वास्तवय् सुर्द्यः चिं सुयागु ?

येँ (नेपालभाषा टाइम्स) – नेपाल कम्युनिष्ट पार्टी (नेकपा) विभाजनया झ्वलय् छगू मू विवाद जुयाः न्ह्यःने वःगु विषय खः- पार्टीया चुनाव चिं सुर्द्यः सुयागु ? ओली पक्षं नं सुद्र्यः चिं थःपिनिगु खः उकिं थ्व थःपिंत हे बीमाः धकाः दावी यानाच्वंगु दुसा नेपाल-दाहाल पुचलं नं सुर्द्यः चिं थःपिनिगु जूगुलिं थ्व थःपिंत हे बीमाः धकाः दावी यानाच्वंगु दु ।

आखिर थ्व निगुलिं पार्टीं दावी यानाच्वंगु सुर्द्यः चिं वास्तवय् चाहिँ सुयागु खः ? थुकिया लागिं थनिं सुइन्यादँ न्ह्यःया राजनीतिक अवस्थापाखे छक्वः लिहां वने माली । थ्व चिं वास्तवय् तत्कालीन जनपक्षीय उम्मेदवार लिसें आदिवासी व मानव अधिकार आन्दोलनया न्ह्यलुवा भाजु पद्मरत्न तुलाधरयागु खः ।

वि.सं. २०४३ सालय् जूगु राष्ट्रिय पञ्चायतया चुनावय् भाजु तुलाधरं सुर्द्यः चिं कयाः दनादीगु खः । अबलय् थ्व चिं वय्कलं ययेकाः ल्ययादीगु नं मखु। अबलय् राष्ट्रिय पञ्चायत चुनावय् उम्मेदवार जुइपिंत सीडीओ कार्यालयय् छगः बाकसय् ल्हाः दुछ्वयाः चिं कायेके बीगु चलन खः । भाजु तुलाधरं अथे हे ल्हाः दुछ्वयाः चिं लिकाःबलय् सुर्द्यः वःगु खः । वय्कः उम्मेदवार जुयादीगु सुर्द्यः चिंयात अबलय् ८६ हजार स्वयां अप्वः भोट वःगु खः । व थःहे छगू कीर्तिमान खः ।

देशय् बहुदलीय व्यवस्था वयेधुंकाः जूगु न्हापांगु आमचुनावय् तत्कालीन नेकपा (एमालें) थ्वहे सुद्र्यः चिंयात चुनाव चिं दयेकूगु खः । अबलय् नं भाजु तुलाधर स्वतन्त्र खःसां सुर्द्यः चिं कयाः चुनाव ल्वानादीगु खः । पञ्चायतकालय् पञ्चायत व्यवस्थाया विरोधी कथं म्हसिउपिं च्याम्ह रापंसत दुगु खः । वय्कःपिं च्याम्हं च्यागू हे अलग अलग चुनाव चिं कयाः त्याना वःपिं खः । तर तत्कालीन एमालें धाःसा तुलाधरया चिंयात हे थःगु पार्टीया चिं दयेकल । सुद्र्यः चिं पद्मरत्न तुलाधरया चिं जूगु कारणं हे पार्टीं उकियात थःगु चिं दयेकूगु खँ वर्तमान प्रधानमन्त्री केपी ओलीं नं स्वीकार यानादीगु दु। तुलाधरया थ्व चिं थौं दक्षिण एशियाया हे दकलय् तःधंगु कम्युनिष्ट पार्टीया चुनाव चिं जूगु दु ।

सम्बन्धित बुखँ

LEAVE YOUR COMMENTS