२३ वडापाखें विशिष्ट व्यक्तित्वपिंत हना
येँ महानगरपालिका २३ वडापाखें वडाया विशिष्ट व्यक्तिपिंत हने ज्या याःगु दु । २३ वडाया ग्वसालय् दछियंकं जूगु थीथी ज्याझ्वःया समापन यायेगु झ्वलय् स्वीन्याम्हं मल्याक विशिष्ट व्यक्तित्वपिंत हने ज्या याःगु खः । शनिवाः येँया सभागृहय् जूगु ज्याझ्वलय् २३ वडाया कलाकारपिंसं सांस्कृतिक ब्वज्या नं याःगु खः ।
येँ महानगरपालिकां २३ वडाया ग्वसालय् चालु आर्थिक दँ २०८२/८३ इ विकास निर्माणया ज्या लिसें स्थानीयतय् व्यक्तित्व विकास, सम्पदा संरक्षण, रोजगार मूलक तालिम, युवा केन्द्रीत थीथी ज्याझ्वःत जूगु दु । २३ वडापाखें याःगु थीथी ज्याझ्वःया जानकारी बीगु लिसें स्थानीयतय् कला न्ह्यब्वये गु कथं वंगु शनिवाः छगू वृहत् ज्याझ्वः जुल । ज्याझ्वःया झ्वलय् २३ वडाया स् वीन्याम्हं मल्याक विशिष्ट व्यक्तित्वपिंत नं हने ज्या याःगु दु ।
राष्ट्रिय सभागृहय् जूगु ज्याझ्वलय् न्ववानादिसें २३ वडाया अध्यक्ष मचाराजा महर्जनं न्हापा येँ महानगर व वडाया ज्या धयागु पूर्वाधार निर्माणय् जक सीमित जुयाच्वंगुयात थःपिंसं कानुन हे दये काः स्थानीय व्यक्तितय्त लक्षित यानाः ज्या यायेफइ कथं बजेट विनियोजन यानागु खँ कनादिल ।
येँ महानगरपालिका विधायन समितिया संयोजक नं जुयाच्वनादीम्ह वय्कलं धयादिल, ‘’येँ महानगरपालिका दुने यापुलांगु बस्ती लाःगु थासय् आः पूर्वाधार निर्माणय् यक्व खर्च यायेमाःगु आवश्यक मदये धुंकल । उकिं जिमिसं थनया स्थानीयतय् व्यक्तित्व विकासय् बजेट फ्यायेमाःगु माग याना वयाच्वनागु खः । तर कानुनी रुपं थथे बजेट विनियोजन याये मदइगु जूगुलिं स्वदँ न्ह्यः व्यक्तित्व विकासया निंतिं नं बजेट फ्याये फइ कथं कानुन हे दयेकागु खः । थ्वहे कारणं आः स्थानीयतय्त रोजगारमूलक तालिम लिसें ल्याय्म्ह पुस्ताया व्यक्तित्व विकास,सांस्कृतिक विकासया निंतिं ज्या याये खंगु दु ।’
ज्याझ्वलय् कवयित्रि प्रतिसरा साय्मि, राजेन्द्र मानन्धर, उपन्यासकार शशीकला मानन्धर , गायक प्रवेशमान शाक्य लिसें कासा ख्यः, संगीत ख्यः, भाषा ख्यःया थीथी व्यक्तित्वपिंत हने ज्या याःगु खः ।
थ्वयां न्ह्यः ज्याझ्वलय् थीथी सांस्कृतिक ब्वज्या नं जूगु खः । दकलय् न्हापां बाबुराजा महर्जनया निर्देशनय् नेवाः बाजंया अर्केस्ट्रा न्ह्यब्वःगु खः । थुकी २३ वडा दुने लाःगु गुंगु त्वाःया बाजं खलःया ल्याय्म्हतय्सं ब्वति काःगु खः । धिमे , धाः, नाय्खिं, खिं, धो लक, मादल, कान्तां दबदब, क्वंचाखिं, पछिमा लिसें बाँसुरीया संयोजनय् थीथी म्येया धुन न्ह्यब्वःगु खः । अथेहे ज्याझ्वलय् वडा पाखें जूगु प्रशिक्षणय् ब्वति काःपिं पीदँ पुले धुंकूपिनि म्ह्याय्मस्त, भौमस्तय् हुलाप्याखं लिसें ल्याय्म्हतय् हुलाप्याखं, थीथी म्ये न्ह्यब्वःगु खः ।
LEAVE YOUR COMMENTS