विश्वकप छनोटय् नेपाः न्हापांगु कासाय् त्यात

येँ – आइसिसी टि–२० विश्वकप छनोटया न्हापांगु कासा नेपालं त्याकूगु दु । ओमानया मस्कटय् जूगु समूह चरणया न्हापांगु कासाय् नेपालं ग्वसाः देय् ओमानयात ३९ रन बुकूगु खः । कमजोर ब्याटिङ याःगु नेपालं उत्कृष्ट बलिङ यासें घरेलु टिम ओमानयात बुकूगु खः ।

नेपालं बिउगु ११८ रनया लक्ष्य ज्वनाः मैदानय् वःगु ओमान मुक्कं ७८ रन दयेकाः अल आउट जूगु खः । ओमानयात ७८ रनय् अलआउट यायेगु झ्वलय् कमलसिंह ऐरीं स्वंगू, कप्तान सन्दिप लामिछाने व दिपेन्द्र सिंह ऐरीं निगू निगू, अविनाश बोहरा व जितेन्द्र मुखियां छगू छगू विकेट काःगु खः । ओमानया निंतिं नासिम खुशीं दकलय् अप्वः २४ रन दयेकूगु खःसा मेपिं कासामितय्सं दोहोरो अंक तक दयेकेमफुत ।

कासाय् न्हापां ब्याटिङ याःगु नेपालं निर्धारित २० ओभर ८ विकेटया क्षतिइ मुक्कं ११७ रन जक दयेकूगु खः । नेपाःया नितिं आरिफ शेखं दकलय् अप्वः नटआउट ३८ रन दयेकूगु खः । अथे हे कप्तान सन्दिप लामिछानें नटआउट १६ रन, लोकेश बमं १६ रन, ज्ञानेन्द्र मल्लं १५ दिपेन्द्र सिहं ऐरीं ११ रन, विवेक यादवं ७ रन, कुशल भुर्तेल ५ रन आशिफ शेखं ४ रन व कमल सिहं ऐरीं १ रन दयेकूगु खः ।

ओमानया निंतिं खबर अलीं स्वंगू, बिलाल खानं निगू व फयाज बट व जिशान मकसूदं छगू छगू विकेट काःगु खः ।नेपालं आः निगूगु कासा शनिवाः फिलिपिन्सलिसे व सोमवाः समूह चरणया अन्तिम कासा क्यानाडालिसे म्हिती ।