नेपाः टि–२० वरियताय् छगू स्थान कुहां वल

येँ- नेपाः आइसीसी टि–२० वरियताय् छगू स्थान कुहां वःगु दु । आइसीसीं सार्वजनिक याःगु न्हूगु वरियता कथं नेपाः १२ औं थासं कुहां वयाः १३ औं थासय् लाःवंगु दु । विश्व वरियताय् इग्ल्याण्ड शीर्ष थासय् दु । अथेहे भारत निगूगु, पाकिस्तान स्वंगूगु, न्यूजिल्याण्ड प्यंगूगु व दक्षिण अफ्रिकां न्यागूगु थासय् दु ।

नेपाःया राष्ट्रिय क्रिकेट टिम थौंकन्हय् टि–२० विश्वकप छनोट कासा म्हितेत ओमानय् दु । छनोट कासा न्ह्यः नेपालं ओमानय् प्यंगू देय् दुथ्याःगु टि–२० सिरिज म्हितूगु खः । सिरिजय् नेपालं ओमानयात बुकूगु खःसां युएइ व आयरल्याण्डलिसे पराजित जूगु खः । थ्व सिरिज युएर्इं त्याकूगु खः ।

थ्व सिरिजय् नेपाःया कासामि सन्दीप लामिछानें टि–२०इ ५० विकेट पुवंकूगु खः । सन्दीप टि–२० इ ५० विकेट पूवंकूम्ह न्हापांम्ह नेपाःया कासामि जूगु खः । सन्दीपं २९ गू कासा म्हिताः ५० विकेट काःगु खः । सन्दीप विश्वय् दकलय् याकनं ५० विकेट काःम्ह स्वम्हम्ह कासामि नं जूगु दु । दकलय् याकनं ५० गू विकेट काःम्ह कासामिया धलखय् श्रीलंकाया अजन्था मेन्डिस शीर्ष थासय् दु । अजन्थां २६ गू कासाय् ५० विकेट पूवंकूगु खः ।

नेपालं आः वइगु शुक्रवाः निसें विश्वकप टि–२० छनोट कासाय् धेंधेंबल्ला याइ । समुह ‘बी’ इ लानाच्वंगु नेपालं न्हापांगु कासा ओमानलिसे म्हिती । अथेहे निगूगु कासा फिलिपिन्स व स्वंगूगु कासा क्यानाडालिसे म्हिती । थ्व पुचःया शीर्ष निगू टिमं सेमिफाइनलय् थाय् दयेकी । अथे हे समूह ‘ए’ नं निगू टिमं सेमिफाइनलय् थाय् दयेकी । फाइनलय् थ्यंगु निगू टिमं विश्वकपय् थाय् दयेकी ।

सम्बन्धित बुखँ

LEAVE YOUR COMMENTS