नेपाःयात मिस्तय् कबड्डीइ पदक वइगु पक्का
येँ (नेपालभाषा टाइम्स)- चीनय् जुयाच्वंगु झिंगुक्वःगु एशियाली खेलकूदय् नेपालं छुं मखुसां छगू कास्य पदक हइगु पक्का जूगु दु । सोमवाः जूगु मिस्तय् कभड्डी कासाय् बंगलादेशयात बुकसें नेपालं कास्य पदक पक्का याःगु खः । लिग चरणया कासाय् नेपालं बंगलादेशयात बुकुसें ३७–२४ या ल्याखं बुकुसें नेपालं सेमिफाइनलय् वनेगु पक्का याःगु खः । कबड्डी सेमिफाइनलय् बूसां निगुलिं टिमयात कास्य बीगु नियम दुगुलिं नेपाःयात कास्य वइगु सुनिश्चित जूगु खः ।
कासा त्यायेवं नेपाली टोलीया कप्तान मेनुका कुमारी राजवंशीं तःधंगु म्हगसयात यथार्थय् परिणत यायेत ताःलाःगु प्रतिक्रिया बिउगु दु । एशियाली खेलकूदया मिस्तय् कबड्डी नेपालं थुगुसी हे न्हापांखुसी ब्वति काःगु खःसा न्हापांगु कुतलय् हे पदक नं पक्का याःगु दु । नेपालं कासाया सुरु निसें हे बंगलादेशयात दबाबय् लाकातःगु खः । नेपालय् न्हापांगु हाफय् २१–१६ या ल्याखं अग्रता काःगु खःसा निगूगु हाफय् नं विपक्षी टिमयात दबाबय् हे लाकुसें कासा त्याकूगु खः ।
मिस्तय् कबड्डी नेपाः लिसें भारत, बंगलादेश, थाइल्याण्ड, दक्षिण कोरिया, इरान व चाइनिज ताइपेइ यानाः न्हय्गू देशं ब्वति कयाच्वंगु दु । नेपाः समूह ‘बी’ बंगलादेश व इरान लिसे लाःगु खः । हरेक समूहं निगू पुचः सेमिफाइनलय् दुहां वनी । समूह ‘बी’ इ स्वंगू जक देय् दुगुलिं छगू जक देय् लिगचरणं पिने लाइ, उकिं छगू कासा त्यायेवं नेपाः सेमिफाइनलय् थ्यनीगु थ्यंमथ्यं पक्का जूगु खः । नेपालं थौं इरानलिसे लिग चरणया कासा म्हिती ।
एशियाली कासाया निंतिं नेपाली मिसा टिमं थुगुसी भारतय् वनाः लछि तक बन्द प्रशिक्षण याःगु खः । प्रशिक्षक पार्वती राई भारतया हरियाणाय् जूगु प्रशिक्षण तसकं फलदायी जूगु खँ धाःगु दु ।
झिंछक्वःगु व झिंनिक्वःगु दक्षिण एशियाली कासाय् नेपाःया मिस्तय् कबड्डीं कास्य पदक त्याकूगु खःसा झिंस्वक्वःगु सागय् रजत पदक त्याकूगु खः । सागय् रजत त्याकूगुलिं हे नेपालं एशियाली खेलकूदय् नं मिस्तय् कबड्डीइ ब्वति कायेगु क्वःछिउगु खः ।
LEAVE YOUR COMMENTS