अर्जेन्टिना न्हापांगु कासाय् बुत

थुगुसीया कोपा अमेरिका धेंधेंबल्लाखय् अर्जेन्टिनां पराजयपाखें सुरुवात यायेमाःगु दु । सुपरस्टार लियोनल मेस्सीया अर्जेन्टिनायात कोलम्बियां झिंनिदँ लिपा न्हापांखुसी पराजित याःगु खः । मेसी व सर्जिया अग्वेरां तसकं दबाब बियाच्वंसां कोलम्बियाया निंतिं निगूगु हाफय् रोजर मार्टिनेज व डुवान जापातां छगू छगू गोल याःगु खः ।

समूह ‘बी’इ लानाच्वंगु अर्जेन्टिना पराजित जुइवं मेसीं तसकं म्हाइपुगु खँ धाःगु दु । न्याक्वःतकया बालन डे’ओर त्याकेधुंकूम्ह मेसीं धाःगु दु, ‘जिमिसं थज्याःगु सुरुवात चाहे जुयागु मखु ।’अर्जेन्टिनां झिंप्यक्वः कोपा अमेरिका कप त्याकेधुंकूगु दु, तर वंगु १९९३ निसें धाःसा छक्वः नं त्याकेफुगु मदुनि ।

लिपांगु निगू कोपा अमेरिकाया संस्करणय् अर्जेन्टिना फाइनलय् थ्यंगु खःसा निक्वलं चिलीपाखें पराजित जूगु खः । म्हिगः चान्हय् जूगु कासाय् बार्सिलोनाया मेसीं गोल यायेगु बांलाःगु ह्वःताः सितिकं छ्वल । कोलम्बियाया निंतिं सब्स्टिच्यूट मार्टिनेजं जेम्स रोड्रिग्वेजया पासय् ७१ औं मिनेटय् न्हापांगु गोल यात ।

जापाटां ८६ औं मिनेटय् मेगु गोल याःगु खः । अर्जेन्टिनां मेगु कासा पाराग्वे लिसे म्हिती ।

सम्बन्धित बुखँ

LEAVE YOUR COMMENTS