विक्रम संवत् व झी नेवाः

२०७५ बैशाख २ गतेया थुगु न्हिपती रति जोशी श्रेष्ठया च्वसु ब्वने खन । उगु च्वसुइ च्वयातःगु नेपाल संवत् व विक्रम संवतया खँकथं निगुलिं संवत् झीसं थुकथं हने धुन कि थौं झी नेवाःतय्सं जातीय अहमवादं दनाच्वनागु मखय् धुंकल । उगु च्वसुइ सक्वया ‘गुँ विहार’या खँ नं दुथ्यानाच्वंगुलिं जि छम्ह वज्रयोगिनी देवी (गुँ बहाः)या पुजारी जूगु नातां थुगु च्वसु च्वयेत बाध्य जुयाः च्वयागु खः ।

सक्वया ‘गुँ विहार’ नेपालमण्डलया हे दकलय् मध्ये पुलांगु विहार धइगु इतिहासकारतय्सं स्वीकार तकं स्वीकार यायेगु यानाच्वंगु दु । सक्व देय्या छगू तसकं च्वछायेबहगु खँ दु । थुगु थासय् च्वनाच्वंपिं नेवाःतय्त नेवाःतय्त विशेष यानाः गुँ बहाःया पुजारीतय्त ‘तारेमाम शरण गुरुजु’ धकाः संबोधन यायेगु याइ । छाय्धाःसां थुपिं गुरुजुपिनिगु वासस्थान गुँइ जूगुलिं थौंकन्हय् सक्व देशय् च्वंपिं बरेजु, शाक्य, बुद्धाचार्य, शाक्य भिक्षु, गुरुजु बाँडा अथे धकाः संबोधन याइगु खः ।

अथे हे गुरुजुपिंसं नं सक्व देशय् च्वनाच्वंपिं सकलसित नेवाः धाइगु । नेपालमण्डलय् थ्व छगू जक थाय् खः, गन गुँइ च्वनीपिं गुँभाजु (गुभाजु) खःसा देशय् च्वनीपिं नेवाः खः ।सक्वया गुँ बहाःया गुभाजुपिनि न्हापा न्हापा न्हिं न्हिं जा नये मदु जुइमाः ।छाय्धाःसां गुँइ वा याःगु उत्पादन मजू जुइमाः । अथे जुयाः जुइमाः कि गुभाजुपिनि सक्व देशय् वयाः छगू गुथि न्यायेकः वयेमाः । उकियात ‘नेपाः जा नयेगु’ धकाः धाइ । गुरुजुपि गुँच्वं कुहां वयाः देशय् वयाः ‘जा’ नः वयेमाःगु थ्व गुथि आतक नं चले याना वयाच्वंगु दु ।

थौंकन्हय् गुरुजुपिं नं सक्व देशय् च्वनेगु याये धुंकूगु दु । अथे खःसां सक्व देशय् च्वनीपिं नाय्, द्यःला, ज्यापु, स्यस्यः, साय्मि, नकःमि, पुं आदि समुदायया अझ नं नेवाः हे धाइगु चलन दनि । सक्व देशं नेपालमण्डलय् वयाः च्वं वःपिं जकमखु सक्व देशय् नं स्थानान्तरण जुयाः वःपिं आपालं दु । अथे हे सक्वं स्थानान्तरण जुयाः नेपाःया उत्तरपाखे तिब्बत, ल्हासा, कुतितक नं वंगु खनेदु । अथे हे महामञ्जुश्री नं धर्म प्रचारया निंतिं तिब्बतय् च्वनाः वज्रयोगिनी व खड्गयोगिनीया प्रचार याना बिज्यात ।

थुकथं हे महामञ्जुश्रीया निर्माणकार्य पुचःनापं वयाच्वंपिं बरेजु (शाक्य)त नं सक्वयापिं हे खः । बरेजु (शाक्य)पाखें हे थौंया वज्राचार्यपिं जूगु खयेमाः धइगु सक्वया गुँ बहाःपाखें आपालं खँ सीके फइ । येँया छगू पुलांगु वस्ती मन्जुपतन, गुगु थासय् सक्वपाखें वयाच्वंपिंत ‘कीर्ति पुण्य’ छ्यंयागु नां न्ह्यःने तयाः वृषदेवपाखें बहाः दयेका बिउगु धइगु इतिहासं पुष्टि याःगु दु । च्वमि रति जोशीजुं च्वयादीगु च्वसुइ स्वनिगलय् च्वंपिं अप्वःथें नेवाःत सक्वया वज्रयोगिनी वने नं, अन वनेबलय् द्यःछेँय् भ्वपुइकातःगु कराहि व जुजु वीरविक्रमादित्यया नं यक्वसिनं खं धयातःगु दु ।

थुगु खँयात कयाः जि स्वयम थः हे वज्रयोगिनी द्यःया पुजारी जूगु ल्याखं थ्व खँयात अस्वीकार यानाच्वना । छाय्कि थ्व थाय् परापूर्वकालंनिसें हे बौद्ध धर्मया महायानी – वज्रयानीतय्गु विहार खः । कराहि नाप छ्यंया स्वापू गुगुं कथं नं मदु । कराहि गुलि पुलां धइगु खँ सीमदु । तर,छ्यं धाःसा कराहि स्वयां न्हूगु खनेदु । द्यःछेँय् च्वंगु उगु कराहि उगु बखतय् बारम्बार छ्यलेगु याना वयाच्वंगु धइगु खँ कराहिपाखें हे सी दु ।

कराहियात खुगू पातां भुनाः दयेकातःगु दुसा छगू थासय् प्वाः गंगुलिं उकियात दोहोरे यानाः दयेकातःगुलिं नं व कराहि बारम्बार छ्यलेगु यानाच्वंगु धइगु खँ पुष्टि जू । थुकिं छगू छुं नं अनुमान यायेछिं धाःसा न्हापा न्हापा थन यक्व हे सम्यक पंचदान नं जूगु जुइमाः । उकिया निंतिं हे कराहि बारम्बार छ्यलेगु याःगु खयेमाः । गबलय् निसें थनया गुँ बहाःया गुभाजुपिं थुगु थासं सरे जुयाः मेथासय् च्वं वनेगु यात व हे इलंनिसें सम्यक पंचदान नं मजुल । अले व हे इलंनिसें व कराहि भ्वपुका तःगु आतक नं अथे हे तयातःगु दु ।

शायद वीरविक्रमादित्य नेपाःयाम्ह हे खयेमाः । थुकी जिगु धायेगु छुं मदु । तर गुँ बहालय् तयातःगु गुगु छ्यं खः, व वीरविक्रमादित्यया धाःसा मखु । छाय् धाःसां उगु छ्यनय् चुडामणि दुगु व सँया कुलि कुलि चिनाच्वंगुलिं थ्व छ्यं सम्यक पंचदान याइगु इलय् थापना यायेमाःम्ह दीपंकर बुद्धयागु खः । थौंतक नं सुयां नं धर्मचित्त उत्पन्न जुयाः पंचदान, नरां पंचदान, सम्यक पंचदान व याइबलय् दीपंकर तथागत बुद्धया मूर्ति वा प्रतिमा तयाः पंचदान न्यायेकेगु याना वयाच्वंगु दु ।

अथे जूगुलिं जि छम्ह सक्व गुँ बहाःया पुजारी जूगु नातां अन च्वंगु कराहि व छ्यंयात विक्रमादित्यनाप स्वाकाः गुगु खँ च्वयातल व गुगुंकथं नं स्वापू दुगु खँ मदु । थुलिं खँय् स्पष्ट जुइत इनाप याना । नापं आवंलिं थ्व सम्बन्धय् च्वसु च्वयादीबलय् नं अज्याःगु भ्रम ब्वलनीगु ज्या याना मदीत नं इनाप यानाच्वना ।