घोषणापत्रया बन्दी !
छगू बःचाधंगु स्कुल । खुगू कक्षातक जक दुगु । सुदूर गामय् । युट्युब पत्रकारत उगु स्कुलय् थ्यनी । अनया स्थिति थुइकेत स्वइ । छगू कक्षाय् वनी । मस्त । शिक्षिकां ब्वंका च्वनी । युट्युब पत्रकारं ब्वंका च्वंम्ह मय्जुयाके न्यनी । ‘छिगु विषय छु ?’ शिक्षिकां लिसः बी ‘साइन्स ।’ पत्रकारं न्यनी । ‘साइन्स’या स्पेलिङ छु ? धयादिसँ । शिक्षिकां गलत स्पेलिङ धाइ । ‘छिं बोर्डय् च्वयाः क्यनादिसँ ।’ पत्रकारं शिक्षिकायात इनाप याइ । शिक्षिकां चकं बोर्डय् च्वइ । च्वःगु भ्याः हे सही जुइमखु । मनय् लूकथंया जुइ । श्रव्य दृश्य सूचना जूगुलिं अन जूगु खँ खंके फइ ।
अथे हे मेम्ह शिक्षिका माय्थ ब्वंकीम्ह जुयाच्वन । अथे हे माय्थया स्पेलिङ च्वयेत अनुरोध याइ पत्रकारं । लिसः व हे गति । धाये दुर्गति । खुगू कक्षाय् ब्वंबीपिं शिक्षिकातय् हालत छु गज्याःगु युटुयुब पत्रिकाय् छर्ल· खनेदइ । स्वये । नुगः गर्खेसे मिना वइ । थज्याःपिं शिक्षिकापिंसं विद्यार्थीतय्त छु स्यन जुइ ? विद्यार्थीतय्सं छु सयेक काल जुइ । श्रव्य दृश्यय् शिक्षिकातय् ख्वाः स्वयाच्वने । इमिसं लिसःत मनय् लू थे बियाच्वंसां इमिके छुं गल्तीयबोध खनेमदु । छुं भय, त्रास, हिच्किचाहतया आभाश मदु । खःगु हे लिसः बियाच्वना । च्वया च्वना । निर्बोध सहजता इमि ख्वालं पिहां वयाच्वंगु दु ।
ख नं खः । मय्जु शिक्षिकापिं थम्हं च्वःगु व धाःगु हे सत्य धक्का धुक्क । इमित लज्जाबोध जुइगु खँ हे मजुल । उकिं मय्जु शिक्षिकापिंसं इमित मनय् लूगु खँ ब्वंकां गानाच्वन । जियाच्वन । मस्तय्सं व हे ग्रहण यानाच्वन । स्कुल न्ह्याना हे च्वन । तर । खास स्कुलय् ब्वंका च्वंपिनि थुकी दोष मदु । देय्या अनकन्टार, सुदूर गां गामय् दुगु गुलि स्कुलतय् स्थिति गुलि बेहाल ! अन छु ब्वंकीगु जुइ ? शिक्षकतय् योग्यता छु जुइ ? विद्यार्थीतय्सं छु सयेकीगु जुइ ? थज्याःगु थासय् च्वंपिं मस्तय् शैक्षिक भविष्य गथे जुइगु खइ ? युट्युबया खबरं गम्भिर चिन्ता याये माःगु चुनौति बी ।
देशय् शिक्षा स्वास्थ्य क्षेत्रय् तःधंगु विकास जूगु सरकारं दावा याइ । ख नं खः, द्वलंद्वः स्तरीय शिक्षण संस्थात दयेधुंकल देशय् । तर । दक्व फुक्क सहर केन्द्रीत । धनी वर्गया निंतिं । देय् धइगु सहरवासीतय् जक मखु । विकास धइगु धनी, पूँजीपतितय् जक एकाधिकार जुइ फइमखु । देय् दुनेया गुगुं नं क्षेत्रय् च्वंपिं देशवासीतसें नं शिक्षाप्रतिया थःगु मौलिक अधिकार उपभोग याये दयेमाः । सुदूर गां गामय् पहाड पहाडय् च्वंपिं साधारण जनताया निंतिं कमसेकम आधारभूत ब्वनेगु सुअवसरया व्यवस्था याना बीमाः । थ्व सरकारया दायित्व खः । तर । न्ह्यसः दनी । देशय् ग्रामिण जनतां आधारभूत शिक्षाया अवसर सार्थक रुपय् काये खनाच्वंगु दु ला ? ग्रामिण सुदूर भेगय् अधिकांश जनता आर्थिक रुपय् विपन्न जुइ । इमि चेतनास्तर तसकं दयनीय स्थितिइ लाइ । इमि चेतनास्तर थकायेत शिक्षाया अवसर तसकं हे आवश्यक जुइ । तर अफसोच ! युट्युब पत्रकारं छगू ग्रामिण स्कुलया शिक्षिकातय् ज्ञानया स्तरया निरीक्षणं गुगु दर्दनाक लिच्वः क्यनी । उकिं प्रष्ट जुइ ग्रामिण भेगया शैक्षिक गतिविधि बारे सरकारं मिखा तिसिनाः खेलवाड यानाच्वंगु दु ।
गामय् स्कुलत चायेकाः चागःचा थें वांछ्वयां सरकारया गांया शिक्षाप्रतिया दायित्व पूवनी ला ? शिक्षकतय् योग्यताया चिउताः तये माः ला कि म्वाः ? शिक्षक शिक्षिकातय्त आवश्यक तालिम बी माः ला कि म्वाः ? स्थानीय तहया सरकारं ग्रामिण स्कुलतय् शैक्षिक गतिविधिया नियमित निरीक्षण यायेमाः ला कि म्वाः ? स्कुलया हेडमास्तरया स्कुलया शैक्षिक स्तरप्रति जिम्मेवारी दइ ला कि दइमखु ? स्कुल चायेकल, बस् । अले छु जुल ? छु ब्वंकल ? फुक्क भगवानया ल्हाती त्वःता बीगु ला ? देय्या झःझः धाःगु सहरत स्वयेबलय् देय् अमेरिका, बेलायतलिसे ज्वः लाइनला धकाः गर्व याइपिं दयेफु । तर देय्या अधिकांश ग्रामिण भूभागय् अविकसित दीनदुःखी जनता तिनि । इमिगु हालत स्वःसा देय् अझं मध्य युगय् तिनि । देय्या समुन्नत विकासया दावा यायेगु खःसा देय्या अधिकांश भूभागय् कठिन जीवन हनाच्वंपिं जनताया विशेष चिउताः तये माः ला कि म्वाः ?
देय्या संविधानय् समाजवादया खँ उल्लेख जुयाच्वंगु दु । देशय् दुगु अधिकांश पार्टीतय्के थःगु दलया नामय् समाजवादी, क्रान्तिकारी, कम्युनिष्ट, माओवादी नां स्वाकेगु, घाकेगु प्रतिस्पर्धा खनेदु । सकल दलं थःगु घोषणापत्रया लक्षित जनताकथं शोषित, पीडित, सर्वहारा वर्ग, उत्पीडित किसान वर्ग, दलित, उत्पीडित ग्रामिण जनतायात न्ह्यथनी । भाषणय् नेतातय्सं इमिगु हे पक्षय् सः सुक्क हाला, ल्हाः म्हूचिनाः लाल सलामया पोज बी । तर आतकया देय्या राजनीतिक दुर्दसाया लेखाजोखा यायेगु खःसा समाजवादी, क्रान्तिकारी, माओवादी धकाः टाय्ग, ब्रान्ड नां छुनाः छखेर जनतायात आकर्षित यानाः मेखेरं दलतय्सं जनतायात व्यवहारय् ध्वं लानाच्वंगु दु ।
थःथःगु सरकारया इलय् दलतय्सं क्रान्तिकारी बान्डयात सुख सुविधा, धन आर्जन यायेगु औजारया रुपय् प्रयोग याना वयाच्वंगु दु । देशय् थौं खने दुगु पाखण्ड व छलछामया राजनीतिं देय्या उत्पीडित सर्वहारा वर्ग, उत्पीडित किसान, मजदुर जर्जर जीवन हनाच्वंपिं ग्रामिण जनता क्रान्तिकारी दलया हे घोषणा पत्रया मात्र बन्दी जुयाच्वंगु दु । उकिं अनकन्टार ग्रामिण स्कुलयात कयाः नुगः मछिंके माःगुया मतलब मदु ।
LEAVE YOUR COMMENTS