तोखायात येँ मनपाया ग्वाहालि

येँ – येँ महा–नगरपालिकां उत्तरी भेगय् लाःगु तोखा नगरपालिकालिसें छगू योजनाया निंतिं सहकार्य याइगु जूगु दु । येँ मनपा प्रमुख विद्यासुन्दर शाक्यं उत्तरी जःलाखःला तोखा नगरपालिका लिसें सहकार्य यायेत्यनागु खँ धयादीगु खः ।

तोखा नगरपालिकां ग्वसाः ग्वःगु बौडेश्वर झरना गुरुयोजना सार्वजनिक ज्याझ्वलय् नवासें येँ मनपा प्रमुख शाक्यं अन्तरनगर साझेदारी ज्याझ्वः अन्तर्गत तोखा नपालिसे सहकार्य यायेगु व उकिया लागिं तोखा नपायात छगू करोड तका बीगु घोषणा नं यानादीगु खः ।

तोखा नगरपालिकाया प्रमुख प्रकाश अधिकारीं धार्मिक व ऐतिहासिक नगरपालिकाया विकासया ल्याखं सम्पन्न याना यंकेत थः प्रतिवद्ध दुगु धयादिल । अथे हे तारकेश्वर नगरपालिकाया प्रमुख रामेश्वर बोहरां थःपिं नं मिले जुयाः ज्या यायेत इच्छा प्वंकादीगु खः ।

तोखा नगरपालिकाय् च्वंगु ऐतिहासिक व धार्मिक सम्पदाया संरक्षण व विकासया निंतिं २५ गू करोडया गुरुयोजना तयार याःगु दु । थुगु योजनाय् बालमैत्री उद्यान, ताँ, देगः थेंज्याःगु सम्पदाया पुनःनिर्माण यायेगु विषययात प्राथमिकता बियातःगु दु ।