रवि लामिछानेया उम्मेदवारी खारेज जुइ ला ?
येँ (नेपालभाषा टाइम्स)÷ राष्ट्रिय स्वतन्त्र पार्टीया सभापति रवि लामिछानेयात राहदानी दुरुपयोग सम्बम्धी मुद्दा न्ह्याकेत दायर जूगु मुद्दा म्हिगः ‘हेर्न नमिल्ने’ य् लाःगु दु । उगु रिट म्हिगः न्यायाधीश अनिल कुमार सिन्हाया एकल इजलासय् लाःगु खः । सिन्हां लामिछानेया नागरिकता सम्बन्धी मुद्दाय् थः नं दुथ्याःगु धासें मुद्दा स्थगित याःगु खः ।
अमेरिकी नागरिक जुयाच्वंगु इलय् हे लामिछानें नेपाःया नागरिकता क्यनाः राहदानी काःगु खःसां लामिछाने विरुद्ध मुद्दा न्ह्याकेम्वाः धकाः महा– न्यायाधिवक्ताया कार्यालयं याःगु निर्णय बदर यायेमाःगु व लामिछाने विरुद्ध मुद्दा न्ह्याकेमाःगु माग यासें युवराज सफलं वंगु सोमवाः रिट तःगु खः । अधिवक्ता सफलं लामिछानेयात गैरकानुनी रुपय् उन्मुक्ति बिउगु धासें रिट तःगु खः ।
थ्वहे झ्वलय् चितवन क्षेत्र नं. २ लय् नं लामिछानेया उम्मेदवारी विरुद्ध मुख्य निर्वाचन अधिकृतया कार्यालयय् प्यंगू उजुरी दर्ता जूगु दु । सहायक निर्वाचन अधिकृत ईश्वर आचार्यया कथं स्वंगू उजुरी उम्मेदवार व उम्मेदवारया प्रतिनिधितय्सं बिउगु खःसा छगू उजुरी अधिवक्ता सफलं इमेलपाखें तःगु खः ।
उजुरीइ विदेशया नागरिकता त्याग याःम्ह मनुखं म्होतिं नं स्वला व्यथित मयासे निर्वाचनय् उम्मेदवार जुइ मदइगु खँ न्ह्यथनातःगु दु । लामिछानें वंगु माघ १५ गते जक येँया सीडीओ कार्यालयं हाकनं नागरिकता काःगु खः ।
लामिछाने विरुद्ध स्वतन्त्र उम्मेदवार सन्तोष थापा, राष्ट्रिय जनमोर्चाया उम्मेदवार जनकराज शर्माया प्रतिनिधि व स्वतन्त्र उम्मेदवार अम्बिका भट्टया प्रतिनिधिं निर्वाचन कार्यालयय् उजुरी तःगु खः ।
उजुरी याःपिसं लामिछानें पुलांगु मतदाता नामावलीया आधारय् उम्मेदवारी दर्ता याःगु व नागरिकता काःगु स्वला मदुनिवं उम्मेदवार जुइ मदइगु जिकिर याःगु दु । मुख्य निर्वाचन अधिकृतया कार्यालयं उजुरीया सम्बन्धय् सम्बन्धित उम्मेदवारयाके स्पष्टीकरण न्यनाः निर्वाचन आयोगय् छ्वयेगु जानकारी बिउगु दु । आयोगं न्हापा हेलचेक्राइ याःगु द्वपं दु ।
चितवनय् रैथाने त्याकेगु अभियान
चितवनया गुगु निर्वाचन क्षेत्रय् रवि लामिछाने त्याःगु खः, न्हापा अन एमाले त्यानाच्वंगु खः । आः एमालें अन चितवन जिल्ला सभापति रामप्रसाद न्यौपानेयात उम्मेदवार दयेकूगु दु । एमालें थुगुसी थःगु पुलांगु सिट हानं कब्जा यायेत पूरापूर शक्ति लगे याइगु खँ दु । एमाले कार्यकर्तातय्सं रास्वपाया रवि लामिछानेयात ‘टुरिस्ट उम्मेदवार’ धासें चितवनया रैथाने उम्मेदवारयात त्याकेमाःगु नारा थ्वयेकाच्वंगु दु । न्यौपाने चितवनय् हे जन्म जूम्ह खः ।
आः रवि लामिछाने विरुद्ध लाःगु रिट व उजुरीया इलय् हे फैसला मजुल धाःसा वय्कः त्याना हे वंसां लिपा हानं मेगु फैसला जुयाः चितवन–३ या सिट हानं खाली जुइ फइगु खँ धाःगु दु । एमाले कार्यकर्तातय्सं मतदातातय्त थौंकन्हय् थ्वहे डर समेत क्यनाः भोट आकर्षित यायेत स्वयाच्वंगु दु । चितवनया थ्व क्षेत्रय् लामिछाने व न्यौपाने दथुइ हे धेंधेंबल्लाः जुइगु अनुमान जुयाच्वंगु दु ।
LEAVE YOUR COMMENTS