
येँ – राष्ट्रिय योजना आयोगया ग्वसालय् ‘शिक्षा ख्यःया दीर्घकालीन सोच’ विषयय् छगू अन्तक्र्रिया ज्याझ्वः जुल । संचार मन्त्रालयय् जूगु अन्तक्र्रियाय् आयोगं शिक्षाय् २५ दँया योजना निर्माण यायेगु विषयय् शिक्षाविद्, थीथी विश्वविद्यालयया प्राध्यापकलिसें सरकारी अधिकारीलिसें सहलह नं ब्याकूगु खः ।
ज्याझ्वलय् नवासें आयोगया उपाध्यक्ष उषा झानं शिक्षाय् खने दयाच्वंगु समस्या चिइकाः आः वइगु दिनय् शिक्षाया निंतिं न्हूगु लँपु क्वःछिनाः वनेमाःगु खँय् बः बियादिसें दीर्घकालीन योजना दयेकेत सरोकारवाला सकलें मिले जुयाः न्ह्याः वनेमाः धयादिल । काठमाडौं विश्वविद्यालयया प्रा. डा. प्रकाशचन्द्र भट्टराईनं व्यावसायिक शिक्षां ल्याय्म्हतय्त विदेश पलायन जुइगुपाखें पने फइगु सम्भावना दु धयादिल ।
अथे हे उगु हे विश्वविद्यालयया मेम्ह प्रा. डा. सुरेश गौतमं शिक्षाय् सरकारं यानाच्वंगु लगानी म्हो जुजुं वनाच्वंगु धासें थथे जुया वन धाःसा थ्व शिक्षा ख्यःया निंतिं हे दुर्भाग्यपूर्ण जुइगुलिं शिक्षाय् लगानी अप्वयेकेत माग यानादिल ।
त्रिभुवन विश्वविद्यालय समाजशास्त्र विभागया प्रा. डा. प्रमोद भट्टं माध्यमिक तहय् अध्यापनय् जुयाच्वंगु कमि कमजोरीयात कुलादिल । आयोगया कार्यक्रम निर्देशक तीर्थ राईं देय्या प्रमुख राजनीतिक दलतय्सं थःगु चुनावी घोषणा पत्रय् शिक्षाया सुधारया निंतिं आपालं खँ दुथ्याकूगु तर व्यवहारिक रुपं उकिया कार्यान्वयन मजुयाच्वंगु धयादिल ।
LEAVE YOUR COMMENTS