भण्डारी लिहां वइ धकाः नेपाल ग्यात

विद्या भण्डारीयात राजनीतिइ महयेत राष्ट्रपतिइ समर्थन !

येँ -अन्ततः सत्तारुढ पार्टी नेकपा (एमालें) वर्तमान राष्ट्रपति विद्यादेवी भण्डारीयात हे हानं मेगु कार्यकालया लागिं नं राष्ट्रपति पदया उम्मेदवार दयेकूगु दु । तर राष्ट्रपति भण्डारी पुनः उम्मेदवार जुइगुया लिउने धाःसा पार्टीया आन्तरिक राजनीतिया प्रशंग नं स्वानाच्वंगु खँ विशेष सूत्रतय्सं धाःगु दु ।

भण्डारीयात हानं मेगु कार्यकालया लागिं उम्मेदवार दयेके मजिउगु बिचाः वरिष्ठ नेता झलनाथ खनालं तयादीगु खः । तर मेम्ह वरिष्ठ नेता माधव नेपालं धाःसा भण्डारीया विरोध यानामदी । विरोध यानामदीगुया कारण धाःसा रोचक दु ।

सूत्रतय्सं धाः कथं यदि भण्डारी आः हानं राष्ट्रपति जुइ मखन धाःसा वय्कः ‘भूपू राष्ट्रपति’ कथं सुम्क मच्वँसे हानं राजनीतिइ सक्रिय जुइगु सन्देश वय्कःया सतीपिंसं बियातःगु दु । भण्डारी भूपू राष्ट्रपतियात दइगु सुविधा मकासे एमालेया राजनीतिइ तुं कुहां वयेगु खँ पिहां वःगु खः ।

यदि विद्या भण्डारी हानं राजनीतिइ कुहां वल धाःसा मेगु पालय् पार्टीया अध्यक्ष वय्कः हे जुयादी । छाय्धाःसां वर्तमान अध्यक्ष केपी ओलीं न्हापा महाधिवेशन जूगु इलय् हे ‘छक्वः जक’ अध्यक्ष जुइगु धकाः माधव नेपालयात कनादीगु खः । उकिं नेता नेपाल थ्व धुंकाः थः हे अध्यक्ष जुइ मानि धकाः पियाच्वंगु दु ।

छुं जुयाः विद्या भण्डारी राजनीतिइ वल धाःसा थः अध्यक्ष जुइ मखनी धकाः वय्कलं भण्डारीयात पुनः राष्ट्रपति दयेका तयेगु खँय् हे समर्थन यानादीगु खँ सूत्रं धाःगु दु । भण्डारी पुनः राजनीतिइ वइगु खँ पार्टीइ तसकं चर्चा जूगु खः ।