तिलौराकोटया अध्ययन यायेत युनेस्को प्रतिनिधि वइगु

येँ (नेपालभाषा टाइम्स)- कपिलवस्तुया राजधानी तिलौराकोटयात विश्व सम्पदा धलखय् दुथ्याकेगु बारे स्थलगत अध्ययन यायेत युनेस्कोया पुचः आः वइगु अगष्ट महिनाय् नेपाः वइगु जूगु दु । लुम्बिनी विकास कोषया सदस्य सचिव सानुराजा शाक्यया कथं वय्कःपिनि स्थलगत भ्रमण लिपा सेप्टेम्बर वा अक्टोवरपाखे तिलौराकोटयात विश्व सम्पदा धलखय् दुथ्याकेगु घोषणा जुइफु ।

तिलौराकोटयात विश्व सम्पदा धलखय् दुथ्याकेगु निंतिं कोषं तयार याःगु मनोनयन दस्तावेज वंगु माघय् युनेस्कोयात लःल्हाःगु खः । फ्रान्सया नितिं नेपाःया राजदूत सुधीर भट्टराईं युनेस्कोया विश्व सम्पदा शाखाया प्रतिनिधियात उगु मनोनयन पत्र लःल्हाःगु खः । थ्व मनोनयन पत्र स्वयेधुंकाः आः युनेस्कोया प्रतिनिधि स्थलगत अध्ययन यायेत वयेत्यंगु खः ।