चाबही गणेद्यः व भैरव जात्रा शुरु

येँ – चाबहीया चन्द्रविनायक व भैरवनाथया जात्रा म्हीगंनिसें शुरु जूगु दु । सकिमिला पुन्हिनिसें न्यायेकीगु थ्व जात्रा कन्हय् तक न्ह्याइ ।
चाबही लागाया हे ऐतिहासिक, सांस्कृतिक व धार्मिक जात्रा चन्द्रविनायक (चाबही गणेशद्यः) व भैरवया पुजा यानाः न्ह्याकूगु खः ।

जात्रा याये स्वयां न्ह्यः पशुपति क्षेत्र विकास कोष अन्तर्गतया अमालकोट कचहरीं सिँ हयाः धुनी जगे यानाः वयां लिपा भवनलिसें सांस्कृतिक गतिविधि लगायतया ज्याझ्वः याःगु खः । जात्राया झ्वलय् म्हिगः चन्द्रविनायक व भैरव खःयात चाबहिलिं पशुपतितकया थीथी लागाय् जात्रा यानाः चाःहिकूगु खः ।

स्वनिगःया प्यम्ह गणेद्यःमध्ये चाबहीया चन्द्रविनायक नं छम्ह खःसा थुम्ह गणेद्यःया देगः प्यदँ न्ह्यःया भुखाचं क्षतिग्रस्त जूगु खः । क्षतिग्रस्त देगः पुनःनिर्माणय् छ्यःगु निर्माण सामग्रीयात कयाः विवाद ब्वलनेवं निर्माणया ज्या दिनाच्वंगु दुसा जात्रा सिधयेवं पुनःनिर्माणया ज्या न्ह्याकेगु जात्रा व्यवस्थापन समितिं जानकारी बिउगु दु ।