बाः मिनाहा मयाःगुलिं व्यापारीतय् धर्ना

येँ (नेपालभाषा टाइम्स) – ‘लकडाउन’ जुयाच्वंगु ईया बाः मिनाहा याये माःगु माग यासें सिभिल मलया व्यवसायीतय्सं धर्ना शुरु याःगु दु ।लकडाउनया कारणं व्यापार ठप्प जूसां नं मल सञ्चालकं बाः मिनाहा मयाः धासें व्यवसायीतय्सं थ्व धर्ना बिउगु खः ।

थ्व स्वयां न्ह्यः व्यवसायीतय्सं वंगु शुक्रवाः मल सञ्चालकयात पसःया ताःचाः लःल्हाःगु खः । तर मल सञ्चालकतय्सं थःपिनि माग बारे ध्यान मबिउ धासें धर्ना च्वनेमाःगु खँ व्यापारीतय्सं धाःगु दु । आः बाः मिनाहा मयाःतले धर्ना च्वनेगु खँ धाःगु दु । मल सञ्चालक समितिं धाःसा २५ असार तक बाः पूपिंत लकडाउन ईया ५० प्रतिशत बाः छुट बीगु व अबले तक मपुल धाःसा २५ प्रतिशत जक छुट बीगु खँ धाःगु दु ।

सिभिल मलय् व्यापारीतय्सं लछिया ८ लाख तक पुलाः पसः तयाच्वंगु दु । ८ लाखय् २५ प्रतिशत जक छुट दत धाःसा लछिया ६ लाख पुलेमाः । थ्व ल्याखं स्वलाया १८ लाख पुले मालीगु जुल । व्यापार हे मदुगु इलय् थुलिमछि ध्यबा पुले मफइगु खँ उमिसं धयाच्वंगु दु ।

थ्वहे झ्वलय् महाबौद्धया छम्ह व्यापारीं धाःसा आः पसःया बाः पुलेगु स्वयां पसः हे त्वःता छ्वयेगु मनस्थिति दयेकाच्वनागु खँ धाःगु दु । ‘नेपालभाषा
टाइम्स’ लिसे खँ ल्हासें उम्ह व्यापारीं धयादिल, ‘स्वलाया बाः म्होति नं न्यागू खुगू लाख स्वयां अप्वः पुलेमाः, मेखे थौंकन्हय् पसलय् सामान नं मदु, बरु पसः हे चायेकः मवनेगु, घरपतिं सामान जफत याःसां छुं समस्या मदु ।’

येँया प्रमुख बजाः जुयाच्वंगु महाबौद्ध, न्हूसतक, खिचापुखू आदि लागाया व्यापारीतय्सं थौंकन्हय् बोहनी जक याये खंसां तःधं तायेकेगु यानाच्वंगु
दु । उकिसनं बैंक, सहकारीपाखें त्यासा कयाः पसः तयाच्वंपिं व्यापारीत ला झन् हे मर्काय् लानाच्वंगु खँ धाःगु दु ।