बंगलादेशयात बुकाः नेपाः फुटबलया फाइनलय्

तेज महर्जनपाखें

येँ – नेपाः लगातार निक्वःखुसी दक्षिण एशियाली कासा (साग) अन्तर्गत फुटबलया फाइनलय् दुहां वनेत सफल जूगु दु । थन जुयाच्वंगु झिंस्वक्वःगु साग अन्तर्गत म्हिगः जूगु समूह चरणया कासाय् नेपालं बंगलादेशयात १–० गोलं बुकाः ल्याः धलखय् शीर्ष थासय् च्वनाः फाइनलय् दुहां वंगु खः ।
लगातार निन्हुयंकं कासा म्हितेमाःगुलिं नेपालं म्हिगःया कासा अपेक्षाकथं प्रदर्शन याये मफुत । आपालं कासामित त्यानुगु खने दुगु खःसां नेपालं न्हापांगु हाफय् याःगु छगू
गोलया ग्वाहालिं फाइनलय् थाय् सुरक्षित याःगु खः । नेपाःया निंतिं छगू जक निर्णायक गोल कप्तान सुजल श्रेष्ठया पासय् सुनिल बलं याःगु खः ।

निगूगु हाफय् रक्षात्मक कासा म्हितेगुली हे अप्वः केन्द्रित जूगु नेपालं अन्तत कासा १–० गोलं त्याकल । थुगु विजय लिपा नेपाःया १० अंक जूगु दुसा निगूगु थासय् लाःगु भुटानं ९ अंक दु । फाइनलय् दुहां वनेत नेपालं बंगलादेश विरुद्धया कासा बराबरी जक याःसां गाःगु खः ।

म्हिगः जूगु कासाया इन्जुरी इलय् नेपाःया कासामियात ख्वालय् दायेवं बंगलादेशया कप्तान जमाल भुयानं ह्याउँगु कार्ड नःगु खः ।