येँया धलखय् नं कोरोना भाइरस

येँ- स्वनिगःया धलय् हे कोरोना भाइरस लूगु दु । स्वनिगःया प्यंगू थासय् धःया नमूना परीक्षण याःगु इलय् निगू थासय् कोरोनाया भाइरस लूगु खः । सेन्टर फर मलिकुलर डायनामिक्स (सीएमडीएन) नेपालं याःगु ‘इन्भाइरोमेन्टल सर्भिलेन्स अफ सार्स २’या प्रारम्भिक अध्ययनया झ्वलय् थज्याःगु तथ्य लुइकूगु खः । उगु अध्ययन स्वनिगःया मू प्यंगू शहरया प्यंगू धःया नमूना संकलन याःगु खः ।

उगु अध्ययन कथं स्वनिगलय् समुदाय दुने नं संक्रमण न्यनेधुंकूगु खनेदुगु क्यंगु खँ थुगु अध्ययनय् दुथ्याःम्ह डाक्टर दिवेश कर्माचार्यं धयादीगु दु । वय्कःया कथं मेमेगु देशय् नं अध्ययन झ्वलय् कोरोना संक्रमितया खी नं कोभिड १९ न्यंकीगु सार्स भाइरस दइ धइगु तथ्य लुइधुंकूगु दु ।

उगु अध्ययनं समुदायय् संक्रमण न्यनेधुंकूगुलिं परीक्षणया दायरा मगाःगु खँ क्यंगु धासें डाक्टर कर्माचार्यं थुगु अध्ययनं संक्रमण जुइधुंकूगु थाय्यात म्हसिकेत ग्वाहालि याइगु बिचाः तयादीगु दु । वय्कलं थःपिनिगु अध्ययनयात आधार दयेकाः संक्रमण खनेदुगु क्षेत्रया मनूत मध्ये जोखिम पुचःयात बिस्कं तयाः परीक्षण यायेफइगु खँ धयादिल । अथे यायेबलय् स्वनिगःया फुक्कं जनताया परीक्षण यायेमाःगु आवश्यकता जुइमखु ।

वय्कलं धयादी, ‘थुगु अध्ययनं संक्रमण न्यनावंगु थाय् सीदइ, थाय् सीदयेधुंकाः न्हापा दीर्घल्वगी, ज्याथ जिथिपिं व जोखिम समूहया मनूतय्त प्राथमिकता बियाः परीक्षण यायेफइ, थथे यायेबलय् राज्यया आपालं किट, जनशक्ति, स्रोत व खर्च बचे जुइ ।’

मेखे जनस्वास्थ्य वैज्ञानिक समिरमणि दीक्षितं भाइरसया म्हो जक मात्र दुगु खःसा धलं वःगु लः जाँच यानाः झ्वलय् भाइरस लुइके मफइगु खँ कनादीगु । वय्कःया कथं आः जूगु अध्ययनं स्वनिगःया छुं थासय् आपालं मनूत संक्रमण जुइधुंकूगु अनुमान नं यायेछिं ।

आःया अध्ययन कथं समुदायलय् संक्रमण जुइधुंकूगु स्पष्ट जूगु धासें सामाजिक दूरी कायम मयायेगु खःसा व मेमेगु सुरक्षा उपाय मनालेगु खःसा संक्रमणया जोखिम पुचलय् न्यनाफइगु खँ नं वय्कलं धयादीगु दु । वय्कलं धयादी, ‘आः ला राज्यं नं समुदायस्तरय् संक्रमण न्यनावंगु तायेकाः उकियात पनेगु निंतिं योजना दयेकेमाःगु दु ।’