जात्रा पर्वयात अनुदान मखु बजेटया व्यवस्था याये -बाबुराजा प्रजापति (जसपा)
बाबुराजा प्रजापति (जसपा)
उम्मेदवार, येँ क्षेत्र नं. ७ (१)
चुनाव प्रचारया ज्या गुकथं न्ह्यानाच्वंगु दु ?
अन्तिम ई जूसां प्रचार प्रसार बांलाक व व्यापक रुपं जुयाच्वंगु दु । घरदैलोयात तीव्रता बीगु नापं मतदातानाप अन्तक्र्रिया यायेगु व जनताया समस्या न्यनेगु व थुइकेगु ज्या जुयाच्वंगु दु ।
छिगु एजेन्डात छु छु खः ले ?
देय्या विद्यमान विकृति, विसंगति व विभेदया अन्त्य यायेगु हे मू एजेन्डा खः । नापं विकास निर्माण, शिक्षा, स्वास्थ्यय् सहज पहुँच दयेकेगु, स्वास्थ्य सेवा व शिक्षा निःशुल्क यायेगु । प्रदेश प्रशासन व सुरक्षा संयन्त्रय् समानुपातिक समावेशीया प्रतिनिधित्व यायेगु जुइ । नेवाः बाहुल्यता दुगु क्षेत्रय् नेवाः सांस्कृतिक स्वायत्त क्षेत्र घोषणाया निंतिं पहल याये । लिउने लानाच्वंगु वर्ग, दलित, उत्पीडित समुदायया उत्थानया निंतिं योजना दयेकाः न्ह्याः वने ।
जनताया प्रतिक्रिया गुकथं वयाच्वंग दु ?
जनता समाजवादी पार्टी वैकल्पिक शक्तिकथं न्ह्यानाच्वंगु पार्टी खः । थ्व पार्टीं देय् व जनताया निंतिं बांलाक ज्या याइ धइगु जनतां विश्वास यानाच्वंगु दु । उकिं पार्टीया उम्मेदवारतय्त हे मतदान यायेमाः धइगु जनताया प्रतिक्रिया दु । आः पुलांपिं मखु, न्हूपिंत ज्या यायेगु मौका बीमाः धयाच्वंगु दु ।
छि त्यानाः प्रदेशसभाया सांसद जुल धाःसा छु यानादी ?
चुनाव त्यात धाःसा दकलय् न्हापां जिगु क्षेत्रया जनतायात जुयाच्वंगु समस्या समाधानया निंतिं पहल याये । येँ देय्यात सफा, स्वच्छ नापं वातावरणमैत्री शहर दयेकेगु जुइ । थनया मौलिक पहिचानयात कायम यानाः साँस्कृतिक, पर्यटकीय शहरया रुपय् विकास याये । परम्परागत जात्रा, पर्वयात अनुदान मखु बजेटया व्यवस्था याये । विकास निर्माणया ज्यायात सम्बन्धित क्षेत्रया सरोकारवालानाप सहलह यानाः योजनावद्ध धंगं न्ह्याके ।
छितः हे त्याकेमाःगुया कारण छु दु ले ?
झीगु मौलिक पहिचान म्वाका तयेगु ल्याखं ज्या याना वयाच्वनाम्ह खः जि । वंगु स्वीदँ न्ह्यःनिसें थीथी खलः, पुचः संघसंस्थाया नेतृत्व यानाः सामाजिक, भाषिक, सांस्कृतिक क्षेत्रय् सक्रिय रुपं ज्या याना वया च्वनागु दु । आः राजनीतिक रुपं सक्रिय जुइमाः धकाः वयाम्ह खः । झी सकलें नेवाःत राजनीतिक रुपं सक्रिय जुइमाः । गबलेतक राजनीतिक रुपं सक्रिय जुइमखु अबलय् तक झीत जुयाच्वंगु अन्याय, अत्याचार विरुद्ध सः तये फइमखु । व हे सः तयेगु निंतिं वयाम्ह जूगुलिं जितः जनतां त्याकाछ्वइ धइगु विश्वास दु ।
छिं स्वयेबलय् त्याइगु सम्भावना गुलि दु ? आधार छु खः ?
पार्टीं जनताया विश्वास त्याके फुगु छगू प्रमुख आधार खः । पहिचानया निंतिं यानागु ज्याया मूल्यांकन, निःस्वार्थ व इमान्दारीपूर्वक यानागु समाज सेवा व भ्रष्टाचार यायेमखु धइगु संकल्प हे जि त्याइगु आधार खः ।
LEAVE YOUR COMMENTS