निक्वःगु नेपालभाषा स्टार म्युजिक अवार्ड जुइगु

यल (नेपालभाषा टाइम्स)- स्टार क्रियसन्सया ग्वसालय् निक्वःगु नेपालभाषा स्टार म्युजिक भिडियो अवार्ड–११४३ जुइगु जूगु दु । अवार्डया निंतिं थीथी विधाय् टप टेनय् लाःपिं थ्व हे वइगु पुस १६ गते शनिवाः दसिपौ लःल्हायेत्यंगु दु ।

निगूगु संस्करणया अवार्ड ज्याझ्वलय् कलाकार स्वतन्त्र संसार महर्जनं थः अबुया नामं स्वनादीगु ‘संसार तेज स्मारक कला सम्मान’ नं लःल्हाइगु जूगु दु । थुगुसी न्हापांखुसी लःल्हायेत्यंगु उगु सम्मान कला ख्यःया न्याम्ह व्यक्तियात लःल्हाइगु जूगु दु ।

क्रियसन्सं बिउगु जानकारीकथं उगु सम्मान नेपालभाषा संकिपा व म्युजिक भिडियोया ख्यलय् नांजाःम्ह निर्देशक पवन जोशी, नांजाःम्ह निर्देशक, कलाकार रामकृष्ण खड्गी, नांजाःम्ह संगीतकारलिसें म्युजिक एरेन्जर जुगल डंगोल, नांजाःम्ह म्येँ हालामि निशा देसार, व सिने पत्रकार श्याम स्मृतयात लःल्हाइगु जूगु दुसा लहना मिडियायात संसार तेज कला कला सम्मान लःल्हाइगु जूगु दु ।

नेपालभाषा स्टार म्युजिक भिडियो अवार्ड नेपालभाषा संगीत व संकिपा ख्यलय् दकलय् ताःहाकःगु व दकलय् अप्वः विधाय् लःल्हाइगु अवार्डकथं कयातःगु दु । निगूगु संस्करणया अवार्ड ज्याझ्वः याकनं हे जुइगु क्रियसन्सं जानकारी बिउगु दु ।