च्वसापासां श्रेष्ठ सिरपाःयात निरन्तरता बीगु
येँ – नेपालभाषाया न्हापांगु भाषिक व साहित्यिक संस्था च्वसापासां नेपालभाषाया ख्यलय् प्रतिष्ठित ‘श्रेष्ठ सिरपाः’यात निरन्तरता बीगु जूगु दु । च्वसापासाया न्हूगु ज्यासना पुचःया नायः साहित्यकार भूषणप्रसाद श्रेष्ठं ताःई न्ह्यवंनिसें दिनाच्वंगु श्रेष्ठ सिरपाःयात निरन्तरता बीगु खँ धयादीगु खः ।
ईलोहं प्रकाशनपाखें च्वसापासाया न्हूगु ज्यासना पुचःयात भिंतुना देछायेगु ज्याझ्वलय् न्हूम्ह नायः श्रेष्ठं उगु खँ धयादीगु खः । छुं ई न्ह्यः च्वासापासाया छगू मुँज्यां नांजाःम्ह गजल च्वमि श्रेष्ठया अध्यक्षताय् न्हूगु ज्यासना पुचः ल्यःगु खः ।
ज्याझ्वलय् नवासें न्हूम्ह नायः श्रेष्ठं च्वासापासाया ग्वसालय् बिया वयाच्वंगु नेपालभाषा साहित्य ख्यलय् प्रतिष्ठित श्रेष्ठ सिरपाः छुं दँ न्ह्यवंनिसें दिनाच्वंगु खःसा आः थःगु नेतृत्वया न्हूगु ज्यासना पुचलं उगु सिरपाःयात निरन्तरता बिया वनेगु प्रतिवद्धता प्वंकादिल ।
भिंतुना देछायेगु ज्याझ्वलय् प्रा. डा. चन्द्रमान वज्राचार्य, लक्ष्मण राजवंशी, नेपालभाषा केन्द्रीय विभाग लुमन्ति दबूया नायः किरण केन रंजितपिंसं न्हूगु ज्यासना पुचःया कार्यकाल सुथां लायेमा धकाः भिंतुना देछानादीगु खः ।
च्वसापासाया न्हूगु ज्यासना पुचलय् भरत साःमि छ्याञ्जे जुयादीगु दुसा प्रा. नर्मदेश्वर प्रधान, प्रा. केशवमान शाक्य, डा. तेजरत्न कंसाकार, डा. सर्वोत्तम श्रेष्ठ, रमेशकाजी स्थापित, कवि पूर्ण वैद्यः, सत्यभामा माथेमा व सुम्निमा तुलाधर प्रधान दुजलय् च्वनादीगु दु ।
LEAVE YOUR COMMENTS