स्यस्यः समाजया भवन शिलान्यास

यल- स्यस्यः समाज यलया थःगु भवन निर्माण जुइगु जूगु दु । समाजया भवन निर्माणया निंतिं आः नकतिनि जग स्वनेगु ज्या जूगु दु ।
यल महानगरपालिका वडा नं. १६ य् च्वंगु समाजया जग्गाय् भवन दयेकेत जग स्वंगु खः ।

वाङ्मय शताब्दीपुरुष सत्यमोहन जोशीं शनिवाः संकल्प पुजा यानादीगु खः । कोरोना संक्रमण व उकिं ब्वलनाच्वंगु परिस्थितियात ध्यानय् तयाः शताब्दीपुरुष जोशीया छेँय् संकल्प पुजा यानाः अनंलि भवन निर्माणस्थल जग स्वनेगु ज्या याःगु खः ।

समाजया नायः ई. सुरेन्द्रगोविन्द जोशीया सभापतित्वय् जूगु ज्याझ्वलय् यल महानगरपालिकाया प्रमुख चिरिबाबु महर्जनं भिंतुना न्वचु बियादीगु खः । ज्याझ्वलय् प्रदेश सांसदपिं ज्ञानेन्द्र शाक्य, शोभा शाक्यलिसें यल महानगरपालिकाया उपप्रमुख गीता सत्याल, वडाअध्यक्षपिं निर्मलरत्न शाक्य, विनोद ताम्राकार, ललितपुर उद्योग वाणिज्य संघया अध्यक्ष मनोजलाल न्याछ्यंसमाजया सल्लाहकारपिं गोपालमान श्रेष्ठ, अजरमान जोशी, समाजया २ नं. क्षेत्रया अध्यक्षलिसें केन्द्रीइ दुजः उत्तम लाखे, समाजया थीथी ख्यःया प्रतिष्ठित व्यक्तित्वपिं, यलया थीथी जातीय संघसंस्थाया अध्यक्ष, प्रतिनिधिपिनिगु उपस्थिति दुगु खः ।

समाजया भवन निर्माणया निंतिं डा. भरतबहादुर अमात्यं सहुलियतय् जग्गा उपलब्ध याना बियादीगु खः ।