थौं महाकवि सिद्धिदासया १५४ दँ बुन्हि

येँ – महाकवि सिद्धिदास महाजुया थौं १५४ दँ बुन्हि खः । राणा शासनय् अस्तित्वया संकटय् लायेधुंकूगु नेपालभाषायात साहित्य सिर्जनापाखें हानं म्वाकेगु ज्याय् अथक योगदान बियादीम्ह महाकवि सिद्धिदासयात नेपालभाषा उत्थानया प्यंगः थां मध्ये छगः याना तःगु दुसा साहित्य ख्यलय् वय्कःयात ‘महाकवि’ या सम्मानं छाय्पियातःगु दु । वंगु लछि न्ह्यः तिनि वय्कःया सम्पूर्ण कृति छथासं तयाः ‘सिद्धिमाः’ नामं सफू पिहां वःगु खः ।

थौं वय्कःया बुन्हिया लसताय् सिद्धिदास स्मृति समाजपाखें थनया भोताहिति दुवाःयात ‘सिद्धिदास चोक’ नां तयेगु ज्याझ्वः यायेत्यंगु दु । उगु थासय् छुं दँ न्ह्यः महाकवि सिद्धिदासया झ्वाता पलिस्था याःगु खःसा आः उगु दुवाःयात हे सिद्धिदास चोक नां तयाः प्रचारय् हयेगु कुतः जुइत्यंगु खः ।