धार्मिक दंगा याकेत नाटकीय गोली काण्ड

येँ – देशय् धार्मिक दंगा याकेगु उद्देश्य तयाः थः मनूपाखें थःत हे गोलीं कयेकेगु ज्या याःम्ह धर्मगुरु श्रीनिवासाचार्ययात प्रहरीं ज्वंगु दु । वयागु हे योजना कथं गोलीं कयेकूपिं निम्ह ल्याय्म्हतय्त पेस्तोल सहित प्रहरीं ज्वने वं आः थःगु भण्डाफोर जुइन धकाः बिसिउँ वनेत तयार जुयाच्वंम्ह २९
दँया श्रीनिवासाचार्ययात म्हिगः सुथय् येँया त्रिभुवन विमानस्थल जःखः लागां ज्वंगु खः ।

वंगु चैत २५ गते विराटनगरया रामजानकी मन्दिरय् जूगु श्रीमद्भागवत सप्ताह पुराणय् मू पण्डित जुयाः वयाच्वंम्ह आचार्ययात चान्हय् छेँय् हे गोलीं कयेकूगु खः । उगु इलय् आचार्ययात माधव चौधरी धाःम्ह मनुखं लप्पाय् जक लाकाः गोली प्रहार याःगु खः । तर प्रहरीं चौधरीयात ज्वने वं आचार्यया नं आगं प्वलाबिउगु खः ।

गिरफ्तार लिपा प्रहरीयात बयान बीगु झ्वलय् आचार्यं देय्यात धर्म निरपेक्ष यायेवं उकिया विरोधय् हानं हिन्दू राष्ट्र हे कायम यायेत गुलि कुतः यानां नं सफल मजुसेंलि हिन्दूवादीतय्त उक्से यायेत थ्व गोली काण्डया नाटक यानागु खँ धाःगु दु । थ्व नाटकया लागिं चौधरीयात पेस्तोल तकं थःम्हं हे उपलब्ध यानागु खँ नं आचार्यं प्रहरीयात धाःगु दु । धार्मिक दंगाया उद्देश्य तयाः थज्याःगु ज्या याःगु जूगुलिं प्रहरीं थुकियात गम्भीरतापूर्वक काःगु दु ।