थेचोय् कथिन चिवरदान

यल (नेपालभाषा टाइम्स)- यल थेचोय् च्वंगु वेलुवनाराम बिहारय् कथिन चिवर दान संपन्न जुगु दु । कथिन दातापिं बच्छ्ला देवी दर्शनधारी, तारादेवी तुलाधर व नक्कलि महर्जनपिनि छेँजःपिं, मातापिता पुण्य कोष परिवार व वेलुवनाराम विहार परिवारपाखें दान यायेत तयार यानातःगु कथिन चिवरयात बाजागाजा सहित देय् चाःहिकाः श्रद्धेय नन्द महास्थविरयात श्रद्धापुर्वक लःल्हाःगु खः ।

वसपोल भन्तें धुतंगधारी तिंसति वर्गिय भिक्षुपिनिगु कारणं गौतम बुद्धया पालय् कथिन चिवर दानया सुरु जूगु खँ कना बिज्यासे थः न्यय्स्वदँ न्ह्यः ख्वपं थेचोय् वया प्रवजित जुयाः अनया हर्ष मालिया छेँय् च्वनागु खँ लुमंकाबिज्यात ।
थुगुसी थन श्रद्धेय चन्दिमो स्थविर भन्ते बर्षावास च्वना बिज्यागु खः । कथिन दान ज्याझ्व लिपा उपासक उपासिकापिं पाखें अष्टपरिस्कार नापं दान प्रदान यायेगु ज्या जूगु खः ।

ज्याझ्वलय् उगु बिहारया उत्तर लागाय् च्वंगु भवन च्वने हे मजीक जीर्ण जूगुलिं उकियात थुनाः विहारया संरक्षक श्रद्धेय भन्ते ज्ञानपुर्णिक महास्थविरया लुमन्ती न्हूगु कथं ‘ज्ञानपुर्णिक स्मृति भवन’ निर्माण जुयाच्वगुलिं उपासक उपासिकापिंत यथाश्रद्धा आर्थिक व भौतिक सहयोग यायेत नं इनाप याःगु खः ।