सुकुम्बासी बस्ती चीकेत थप बलसहित वनीगु

येँ (नेपालभाषा टाइम्स)- येँया थापाथली लागाय् च्वंगु सुकुम्बासी वस्ती चीकः वंपिं येँ महानगरपालिकाया नगर प्रहरीयात सुकुम्बासीतय्सं अप्पां कयेका लिना छ्वःगु दु । उपिं छेँय् छेँय् च्वंगु घरेलु ल्वाभः समेत ज्वनाः सतकय् वःगु खःसा उमिगु आक्रमण पने मफयाः नगर प्रहरी फुक्क भागाभाग जुइक बिसिउँ वनेमाःगु खः ।

येँ महानगरपालिकां येँ देय्या थीथी थासय् च्वंगु फुक्क सुकुम्बासी वस्तीत चीकेगु निर्णय यासें वस्ती खाली या धकाः सार्वजनिक सुचं समेत जारी याःगु खः । तर अन च्वंपिं सुकुम्बासीतय्सं अटेर याःगुलिं म्हिगः न्हिनय् डोजर यंकाः वस्ती थुना छ्वयेगु ज्या याःगु खः ।

तर वस्तीइ च्वनाच्वंपिं सुकुम्बासीत फुक्क पिहां वयाः नगर प्रहरीयात अप्पां कयेकाः ख्याना छ्वःगु खः । उपिं थःगु छेँय् च्वंगु चुपि, खुकुरी, कथि आदि थेंज्याःगु घरेलु ल्वाभः समेत ज्वनाः सकतय् पिहां वःगु खः । उमिसं अप्पां कयेकाः याःगु आक्रमणय् लानाः १७ म्ह नगर प्रहरी घाःपाः जूगु खँ धाःगु दु । उकी मध्ये छुं नगर प्रहरीयात अस्पतालय् वासः याके माःगु खः ।

सुकुम्बासी चीकेगु लागिं नगर प्रहरीया प्रमुख राजु पाण्डे थः नं वंगु खःसां आक्रमण लिपा वय्कः समेत बिसिउँ वनेमाःगु खः ।सुकुम्बासीतय्सं बिसिउँ वंपिं नगर प्रहरीयात समेत लितुमतु लिनाः प्रहार याःगु खः । उमिगु आक्रमणं यानाः म्हिगः सुकुम्बासी वस्ती चीकेगु नगरपालिकाया कुतः सफल जुइ मफुत । तर आः नगरपालिकां थप बल सहित पूर्ण तयारी यानाः वस्ती चीकेगु ज्या याइगु खँ धाःगु दु ।

येँ मनपाया प्रवक्ता नविन मानन्धरं कनादी कथं आः नगरपालिकां पूर्ण तयारी यानाः वस्ती खाली याकेगु तयारी यानाच्वंगु दु । उकिया लागिं रणनीति दयेके धुंकूगु दु ।
आः थापाथलीया वस्ती चीकेगु ज्या जुयाच्वंगु खःसां नगरपालिकां येँ मनपा दुने लाःगु फुक्क हे वस्ती चीका
छ्वइगु खँ नं वय्कलं ‘नेपालभाषा टाइम्स’ यात कनादिल ।

थौंकन्हय् येँया थापाथली लिसें शंखमुल, वानेश्वर आदि लागाया खुसि सिथय् अनधिकृत रुपं जग्गा कब्जा यानाः सुकुम्बासीत च्वनाच्वंगु दु । उमित नेपाली कांग्रेस, नेकपा (एमाले), माओवादी थेंज्याःगु तःधंगु पार्टीतय् राजनीतिक संरक्षण प्राप्त दुगु जुयाः सुना नं उमित चीके मफयाच्वंगु खः । म्हिगः ल्वापु जूगु इलय् नं गुलिसिनं धाःसा थःगु सामान मेथाय् चीकेगु ज्या नं यायेधुंकूगु खँ धाःगु दु ।