पार्टी मिले यायेगु चीनया कुतः

राष्ट्रपति भण्डारीलिसे तकं पार्टी एकताया बारे खँल्हाबल्हा

येँ (नेपालभाषा टाइम्स) – न्हापा लिपा जूसा ‘शान्त कुटनीति’ इ विश्वास याना वयाच्वंगु जःलाखःला देय् चीन थुगुसी नेपाःया मामिलाय् अतिकं खुले जुयाः पिहां वःगु खँय् नेपाःया राजनीतिक ख्यः अजूचाःगु दु ।

संसद विघटन जुयाः नेकपा निकू कुचा जुइगु अवस्थाय् थ्यनेवं चिनियाँ कम्युनिष्ट पार्टी अन्तर्राष्ट्रिय विभागया उपमन्त्री गुओ येचौया नेतृत्वय् नेपाः वःगु प्यम्हेसिया पुचलं म्हिगः व म्हीग नेकपाया निगुलिं पुचःया वरिष्ठ नेतातय्त नापलानाः खँ ब्याकल । उमिसं राष्ट्रपति विद्यादेवी भण्डारीलिसे समेत पार्टी विभाजन बारे न्यनेकने याःगु खँ सीदुगु दु ।

चिनियाँ पुचलं संसद पुनर्स्थापना जुइ वा मजुइ धइगु सिबें नं आः नेकपा हानं एकिकृत जुइ लाकि जुइ मखु धइगु खँय् अप्वः चिउताः प्वंकूगु खँ उपिंलिसे वार्ता याःपिं नेतातय्सं धाःगु दु । नेतात नापलायेगु झ्वलय् चिनियाँ पुचलं थःगु खँ कनेगु सिबें नं नेपाःया नेतातय्गु खँ अप्वः न्यनेगु ज्या याःगु खः ।

चिनियाँ पुचः नेपाः वनाः थनया नेतात नापलाःगु थ्व ज्यायात नेपाःया आन्तरिक हस्तक्षेप मखु धासें तसकं सतीम्ह जःलाखःला देय्या राजनीतिइ वःगु उथलपुथल प्रति चिन्ता व्यक्त यानागु जक खः धाःगु दु। बेइजिङय् अनया विदेश मन्त्रालयं म्हिगः थ्व धापू पित हःगु खः ।

भारतपाखें सतिकं निरीक्षण
नेपालय् विकास जूगु न्हूगु राजनीतिक परिवर्तनय् चीनं क्यनाहःगु सक्रियतायात भारतं सतिकं च्वनाः निरीक्षण यानाच्वंगु संकेत प्राप्त जूगु दु। चीनया प्रतिनिधि मण्डल हे नेपाः वयाः थीथी नेतातय्त नापलानाः खँल्हाबल्हा शुरु याःसां आः तक भारतं थःगु सक्रियता धाःसा क्यंगु मदुनि । भारतीय राजदूत विजयमोहन क्वात्रा तकं थ्व इलय् न्हूदिल्ली वनाच्वंगु दु। भारतं आः तयाच्वंगु निगरानी स्वयेबलय् चिनियाँ गतिविधि सिधयेवं भारतपाखें थःगु चाल सनीगु सम्भावना अप्वया वःगु खनेदु ।

चिनियाँ प्रतिनिधि मण्डल नेपाः वयाः नेतात नापलाःगु खँयात भारतं ‘नेपाःया आन्तरिक मामिलाय् हस्तक्षेप’ धकाः द्वपं बीवं बेइजिबं चीनपाखें नं थ्व आन्तरिक मामिलाय् हस्तक्षेप मखु धकाः लिसः बियाहःगु दु । चीनं नेपालय् विकसित संकटयात नेपाःया नेतातय्सं बांलाक ‘ह्याण्डल’ याये फयेमा धकाः थःपिंसं कुतः यानागु खः धकाः धाःगु खँयात भारतीय सञ्चार माध्यमतय्सं धाःसा ‘चीनं संकट बांलाक ह्याण्डल या धकाः नेपाःया नेतातय्त धाल’ धकाः प्रचार याना हःगु दु। भारतीय सञ्चार माध्यमतय्सं चिनियाँ गतिविधियात महत्वपूर्ण थाय् बियाः प्रचार यानाच्वंगु दु ।

सम्बन्धित बुखँ

LEAVE YOUR COMMENTS