ने. सं. ११४४ चौलाथ्व दशमी -

यकिन तथ्यांक मदु बुंगद्यःया सम्पत्तिया

प्यम्ह करुणामय मध्ये बुंगद्यःया गुथियात पशुपतिया गुथि लिपाया नेपालय् दकलय् अप्वः सम्पत्ति दुगु गुथिया रुपय् कायेगु यानातःगु दु । अथे खःसां बुंगद्यःया सम्पत्ति गुलि दु धइगु बारे धाःसा आतक यकिन जुइफुगु मदुनि । गुथिया जग्गा संरक्षण व बुंगद्यःया जात्रा संचालनया निंतिं जिम्मेवार निकाय गुथि संस्थान यल शाखा तकं थ्व सम्बन्धय् अनभिज्ञ दु ।

यल जिल्लाया साविकया पीछगू गाविसमध्ये बछि स्वयां अप्वः व साविकया यल महानगरपालिका (साविकया उपमहानगरपालिका)या गुलिखे वडाय् तकं बुंगद्यःया नामय् आपालं जग्गा दुगु यल महानगरवासीतय् धापू दु । करिब निगूत्या दशक न्ह्यःतनक ३००० रोपनी स्वयां अप्वः जग्गा थीथी थासय् दु धइगु सीदुगु ज्योतिगा दैवज्ञ कीर्तिमदन जोशीं कनादी ।

वय्कःया अबुं थीथी थासय् च्वंगु जग्गा गन गुलि दु धकाः लिखित रुपं हे गुथि संस्थान यलयात जानकारी बियादीगु खः । वय्कलं धयादी, ‘बाः मदये धुंकाः न त मेपिं सुनां चिउताः काःगु खने दत, न त गुथिं हे थःगु सम्पत्ति मालेगु कुतः याःगु दु ।’
गुथिया स्वामित्वय् दुगु बुंगद्यःया नामय् जक थ्यंमथ्यं १५० रोपनी तैनाथी जग्गा दुगु शाखाया प्रमुख शैलेन्द्र पौडेलं कनादी ।

‘थ्व म्हय् (मोहि) नं लगे मजूगु जग्गा खः । आम्दानीया ल्याखं थ्व जग्गायात दकलय् महत्वपूर्ण जग्गाया रुपय् कायेगु याः ।’, वय्कलं धयादी, ‘तर उगु जग्गापाखें थःपिंसं नं छुं लबः काये फयाच्वंगु मदु ।’ गुथिया नामय् दुगु जग्गा व कवः छुं नं ज्याकुथिं चलनचल्तीया भावं बालं बीमफुगुलिं आम्दानी याये मफुगु खः । बुंगद्यःया जक मखु मेमेगु द्यः व देगःया नामय् दुगु जग्गापाखें नं गुथिं आम्दानी याये फयाच्वंगु मदु ।

गुथिया नामय् जक ३९५ रोपनी ६ आना १ दाम जग्गाय् म्हय् लगे जुयाच्वंगु दु । म्हय् दुगु जग्गामध्ये गुलिखे रकमे थम्हं हे व गुलिखे धाःसा गुथि थम्हं आयस्ता कायेगु यानाच्वंगु दु । झण्डै सत्या स्वयां अप्वः जग्गा बुंगद्यःया गुथिया नामय् दुगु खःसां दतां हे जुइ ल्यं दुगु गुथि संस्थान यल शाखाया प्रमुख पौडेलं कनादी ।

बुंगद्यःया रथ जात्राया निंतिं सिँया ज्या याइपिं बाराहितय् निंतिं धकाः फ्यानातःगु १४४ रोपनी जग्गा नं दर्ता जुइ ल्यं दनि । वय्कलं धयादी, ‘गुलिखे जग्गा दर्ता प्रक्रियाय् दुसां नं प्रक्रिया ताःहाकः जूगु व झन्झट नं उतिकं दु, उकिं जग्गा दर्ता हे जुइ ल्यं दनि ।’गुथिया जग्गा रैतानी (व्यक्तिगत नामय्) याये मदइगु नियम दयेके न्ह्यः हे बुंगद्यःया जग्गा नं रैतानी जुलज । ६०१ रोपनी ५ आना १ दामम जग्गा रैतानी जूगु गुथि संस्थानया तथ्यांकं क्यनातःगु दु ।

रैतानी जग्गाया ध्यबा धाःसा अक्षय कोषया रुपय् तयातःगु दु । व नं बुंगद्यःया जात्रा संचालन यायेत खर्च यायेगु याना वयाच्वंगु दु । बुंगद्यःया आम्दानीं हे जक जात्रा कःघायेगु याना वयाच्वंगु धासें प्रमुख पौडेलं धयादी, ‘म्हय् नं बाली पुलेगु (कुत बुझे यायेगु), अक्षय कोषया ध्यबा व गुथिया जग्गाय् छेँ दनीगु इलय् कायेगु यानाच्वंगु दस्तुर हे आम्दानीया स्रोत खः ।’

थीथी व्यक्तिं गुथिया तैनाथी जग्गायात ताःई न्ह्यःनिसें छ्यला वयाच्वंगु दु । तर इमिगुपाखें गुथिं नगन्य मात्राय् ध्यबा कायेगु यानाच्वंगु दुसा व नं काये खनाच्वंगु मदु । वय्कलं धयादी, ‘गुथिं दकलय् आम्दानी याये फइगु तैनाथी जग्गा जूसां उकियात उपयोगय् हये फयाच्वंगु धाःसा मदु ।’

गुथि संस्थान थःगु सम्पत्ति मालेगु व उकिया संरक्षण यायेगु ज्याय् लगे जुइमाःगु दैवज्ञ ज्योतिष जोशीं बः बियादी । गुथिया जग्गा थीथीकथं छ्यलाबुला यानाच्वंपिंसं नं इमान्दार जुयाः पुलेमाःगु शुल्क पुलेमाः । वय्कलं धयादी, ‘भगवानया नामय् दुगु जग्गा भोग चलन याइपिंसं धर्मयात लुमंकाः व इमान्दार जुयाः पुलेमाःगु शुल्क पुलेमाः ।’