कोरियन पप कभर हुलाप्याखं कासा जुइगु

येँ – नेपाः व कोरिया दथुइ सांस्कृतिक आदान प्रदान यायेगु ल्याखं ‘कोरियन पप कभर हुलाप्याखं कासा जुइगु जूगु दु । हुलाप्याखंपाखें निगू देय्या दथुइ सांस्कृतिक आदान प्रदान यायेगु ल्याखं उगु कासा यायेत्यंगु खः । थ्व हे वइगु मंसिर २८ गते थनया राष्ट्रिय नाचघरय् जुइगु कासाय् नीखुगू पुचःया दथुइ धेंधेंबल्लाः जुइ ।

कासाय् न्हापयात स्वीद्वः, लिउयात नीद्वः व लियांलिउ लाःगुयात झिद्वः तका दां पुरस्कारया व्ण्वस्था दुगु संस्थापक कार्यकारी निर्देशक सुरेश मोक्तानं जानकारी बियादीगु दु । कासाय् ब्वति कायेत न्हापांगु चरणय् देय्या थीथी सहरय् प्रतियोगी छनोट याःगु खः । येँय्लिसें पोखरा, नारायणघाट, बुटवल, धरानय् सत्या स्वयां अप्वः पुचःपाखें छनोट यानाः अन्तिम प्रतिस्पर्धाया निंतिं नीखुगू पुचः छनोट याःगु खः ।

कासाय् उत्कृष्ट पहिरन, व याकः हुलाप्याखंया निंतिं न्याद्वः–न्याद्वः तका दां नं पुरस्कारया व्यवस्था दुगु युथ फर चेन्जया अध्यक्ष जागृत पहाडीं कनादिल । सन् २०१५ य् गठन जूगु ‘स्ट्रकपप’ नांया संस्थाया ग्वसालय् जुइगु कासाय् युथ फर चेन्जं सहकार्य यानाच्वंगु दुसा द इन्भिन्सिभल इभेन्ट्स एण्ड म्यानेजमेन्टया व्यवस्थापनय् उगु कासा जुइत्यंगु खः । आयोजक स्ट्रकपप कोरियन हुलाप्याखं कलाकारतय् संस्था खः ।