झः झः धायेक क्वचाल वः फेस्टिभल
थिमि(नेपालभाषा टाइम्स)÷ मध्यपुर थिमि नगरपालिकाया ग्वसालय् व मध्यपुर पर्यटन विकास समितिया सहकार्यय् जूगु ‘वः फेस्टिभल’ तःजिक क्वचाल । थनया निगू पुखुलिइ नेवाः संस्कार व संस्कृतिया छगू अपरिहार्य नसाज्वलं ‘वः’या बारे जानकारी बीगु नापं मध्यपुर थिमिइ आन्तरिक व बाह्य पर्यटनया विकास यायेगु ल्याखं उगु फेस्टिभल जूगु खः ।
फेस्टिभलया उलेज्या यानादिसें मध्यपुर थिमि नगर प्रमुख सुरेन्द्र श्रेष्ठं थिमि नगरया सम्पदा व सम्भावित पुलांगु सहर जूगुलिं पर्यटन प्रवद्र्धन यायेगु उद्देश्यं फेस्टिभलया आयोजना यानागु जनकारी बियादिल ।
सुथसिया ११ ताः इलय् शुरु जूगु महोत्सवय् बहनिसिया ७ ताः इलय् तकं उतिकं मनूत वयाच्वंगु फेस्टिभल प्रचार संयोजक रत्नकृष्ण श्रेष्ठं कनादिल ।
फेस्टिभलय् वःया थीथी ताजि ख्यें व, ला वः, लापी, मिक्स वः, म्हुकं वः, कसूवःलिसें समय्ज्वलं, जुजु धौ, कचिलालिसें थीथी नसात्वँसा ज्वलं नं तयातःगु खः ।
मध्यपुर थिमिया मौलिक उत्पादन बजि, तू चिकं, सेरामिक्सलिसें थीथी नसाज्वलंया २३ गू स्टल तयातःगु फेस्टिभलय् स्वनिगःया थीथी थासं नं व्यवसाय यायेत स्टल तः वःगु ग्वसाः खलकं जानकारी बिउगु दु ।
LEAVE YOUR COMMENTS