बलात्कारया द्वपनय् सशस्त्रया एसएसपी ज्वन

येँ (नेपालभाषा टाइम्स) – सशस्त्र प्रहरी (एपीएफ)या वरिष्ठ उपरीक्षक (एसएसपी) राजेन्द्र अधिकारीयात बलात्कार याःगु द्वपनय् ज्वंगु दु। सशस्त्र प्रहरीया तालिम केन्द्र लामापाटन पोखराय् ज्या यानाच्वंम्ह अधिकारीयात बलात्कारया द्वपनय् ज्वनागु खँ कास्की प्रहरीया उपरीक्षक एसपी जीवन श्रेष्ठं कनादीगु दु ।

एसएसपी अधिकारीविरुद्ध पोखराया हे छम्ह मिसां बलात्कार याःगु द्वपं बियाः उजुरी बिउगु खः । उम्ह मिसाया मौखिक उजुरीया आधारय् अधिकारीयात ज्वंगु खः । आः थुकिया बारे अनुसन्धान जुयाच्वंगु खँ एसपी श्रेष्ठं कनादीगु दु ।

मेखे धनगढीइ थः हे म्ह्याय्यात बलात्कार याःम्ह व थः हे मांयात बलात्कार याःम्ह निम्हेसित नं प्रहरीं ज्वंगु दु। धनगढीया पञ्चेश्वर गाउँपालिका ४ या छम्ह ४५ दँ दुम्ह मिजनं थः हे झिदँ दुम्ह म्ह्याय्यात तःक्वः हे बलात्कार याःगु खँ प्रहरीं धाःगु दु। मामं न्हापा हे त्वःता वनेधुंकाः उम्ह मचायात अबुम्हेस्यां निदँ न्ह्यवंनिसें बलात्कार याना वयाच्वंगु खः ।

म्हिगः नं थथे हे कुकृत्य यायेत्यंबलय् मचा बिसिउँ वःगु खः । मचा बिसिउँ वयेवं गामय् च्वंपिंसं न्यनकेन याःबलय् निदँ न्ह्यवंनिसें अबुम्हं बलात्कार यानाच्वंगु खँ सीदुगु खः ।

अथेहे धनगढीया हे पुर्चौडी नगरपालिका १० या छम्ह मिजंयात थः हे मांयात बलात्कार याःगु द्वपनय् ज्वंगु दु। ३२ दँया उम्ह मिजनं थःगु हे छेँय् ६१ दँया थः मांयात जबर्जस्ती यानाः विषादी नःगु खः । छेँय् मांम्हेसित बलात्कार याःगु सियाः वडाअध्यक्षं प्रहरीयात खबर याःगु खः ।