
साःभिं नये । बांलाःगु पुने । न्ह्यइपुक च्वने । आनन्द काये । थुकथंया बिचाः सकसिकें दइ । थौंया आधुनिकताय् सकलें न्ह्यइपु तायेका जुइ । होटेलय् जक मखु, रेष्टुराँ, डान्सबार पार्टी प्यालेसय् तकं म्वःम्वः । त्वह छता माः, न्हियान्हिथं भ्वय्, ब्याहा भ्वय् ला छखे हे ति इहि यायेगु, जन्मन्हि यायेगु तकं पार्टी पालेसय् । अय्लाः थ्वँ जक मखु। आधुनिकया नामय् बियर, ह्विस्की, वाइन, हुक्का नाप न्ह्यइपु तायेकी । म्ये हालेगु व म्ये न्यनेगु जक मखु, प्याखं हुलेगु तकं धेंधेंबल्लाः जुइ । चान्हिया ल्याःचाः मदु। उकिं अनैतिक ज्याखँ यायेगु अप्वल । थःत माःगु थःगु माग स्वया यक्व खर्च यायेगु यात । थुकिं आर्थिक अवनति जुयाच्वंगु दु। धनसम्पत्ति नास जुयाच्वंगु दु। भोगविलास जुयाच्वंगु दु। खय्त ला थौं स्वयां २६०० दँ न्ह्यः तथागतं धन सम्पत्ति नास जुइगु कारण क्यनाबिज्याःगु खः । थुगु खँ वसपोलं गृहपति सिगालपुत्रयात कना बिज्याःगु खः ।
तथागतं भोगविनाशया खुगू कारण कनाबिज्याःगु दु। गुगु खुगू थुकथं दु – सुरापान यायेगु।कुबेलाय् चाःहिउे वनेगु। प्याखं तमासा स्वःवनेगु। तास म्हितेगु। पापी मित्रया संगत यायेगु। अलसि जुया च्वनेगु ।
थुगु खुगू कारणयात नं वसपोलं विस्तृत व्याख्या यानाबिज्याःगु दु। दकलय् न्हापा सुरापानया खुगू दोष स्वये । सुरापान याइम्हेसिया खुगू दोष दइ । सुरापानया सुरय् थनया थन तुं धन सम्पत्ति नास जुइ । वं धन सम्पत्ति छेँ बुँ तिसा वसः तकं ल्यंकी मखु। सुराया सुरय् लाक्वपाक्व खँ ल्हाइ । वया वचन असंयमित जुइ । थुकिं यानाः मांबौ दाजुकिजापिं नाप जक मखु। थःथिति जःलाखःलापिं नाप तकं ल्वापु जुइ । सुरापान याइम्हसित नाना कथंया ल्वचं कइ । सुराया सुरय्वं सकसितं अपशब्द न्ववाइ । थुकिं यानाः वया बदनमी जुइ । सुरा मनूयात बेहोस याना बी । बेहोसी जुइवं वयाके लाज व भय दइमखु। व थः यत्थे सना जुइ । यत्थे याना जुइ । वया लाज तनी । वया प्रज्ञाज्ञान नं कमजोर जुइ ।
चाःहिलेगु न्ह्यइपुकेगु इच्छा सकसिकें दइ । तर चाःहिले धायेगु न्ह्यागु इलय् नं चाःहिला जुइमजिउ । कुबेलाय् चाःहिउ वनेगुलिं खुगू दोष दु। गुगु थुकथ खः । कुबेला धायेवं चान्हय् वा लिवाक जुइ । थुगु इलय् खिउँसे च्वनी । लँय् कथं कइ । सर्पं न्याइ । महितातसें दुःख बी । थकालिपिं कुबेलाय् चाःहिउ जुलकि मस्त नं उकथंया ज्याखँ याइ । थुकिं यानाः थः जक मखु। सन्तति तकं असुरक्षित जुइ । जब छेँ थुवाः कुबेलाय् पिहां वनी । अन खुं दुःख बी । वया धन सम्पत्ति असुरक्षित जुइ । वयात सकसिनं शंकाया दृष्टिं स्वइ । मेपिंसं अपराध याःसां वयात द्वपं वइ । थुकिं यानाः दुःखया भागीदार जुइ ।
प्याखं स्वः जुइगु न्ह्यइपुकेया लागि खः । तर थुकी नं खुगू दोष दु। प्याखं स्वयेगु बानी मन चंचल धायेका जुइ । गन गबले छु प्याखं दु व जक बिचाः याना जुइ । थःम्हं यायेमाःगु ज्याखँय् मन वनीमखु। थःम्हं प्याखं स्वः थें वसः पुना जुइ । प्याखंम्वःतय् दथुइ थः थना न्ह्यइपुका जुइ । थःम्हं यायेमाःगु नित्य कर्म छखे लाइ । प्याखनय् न्ह्यइपुका च्वंगु इलय् खुँ डाकुतसें छेँया सम्पत्ति खुयायंकी ।
पासा सकसितं माः । सकसियां पासा दइ । मस्तय् जक मखु। ल्याय्म्हल्यासे बुराबुरीतय् नं पासा माः । पासापिं मुना न्ह्यइपु तायेकी । सुखदुःखया खँ ब्याकी । तर पासा न्ह्याम्हं यायेमजिउ । मभिंपिं पासा थः जक मभिं जुइ मखु। वं सकसिनं मभिंगु लँपुइ यंकी । मभिंम्ह पासा याके खुगू दोष दइ । मभिंम्ह पासा बाह्रमासे जुइ । नये त्वनेगुलिइ लठ्ठ जुइम्ह जुइ ।
न्ह्यइपुक ई छ्यायेत कौ ह्वायेगु। तास म्हितेगु नं याः । थौंकन्हय् ला झन् क्यासिनो वनाः न्ह्यइपुकी । थुकी पलख आनन्द वइ । न्ह्यइपुसे च्वनी । तर थुकी नं खुगू दोष दु। तास म्हिताः त्याःम्ह न्ह्यइपु तायेका जुइ । तर बूम्हेसिया वैरीभाव ब्वलंकी । थम्हं भोग सम्पत्ति नास याये मालेवं मनय् सन्ताप ब्वलनी । तासबाज म्हितीम्हेसित सुनांनं विश्वास याइमखु। आपतया इलय् पासाभाइपिंसं साथ बी मखु।
पासा सकसितं माः । सकसियां पासा दइ । मस्तय् जक मखु। ल्याय्म्हल्यासे बुराबुरीतय् नं पासा माः । पासापिं मुना न्ह्यइपु तायेकी । सुखदुःखया खँ ब्याकी । तर पासा न्ह्याम्हं यायेमजिउ । मभिंपिं पासा थः जक मभिं जुइ मखु। वं सकसिनं मभिंगु लँपुइ यंकी । मभिंम्ह पासा याके खुगू दोष दइ । मभिंम्ह पासा बाह्रमासे जुइ । नये त्वनेगुलिइ लठ्ठ जुइम्ह जुइ ।
मनूयाके दइगु छगू स्वभाव अलसि पह खः । अलसि पह पिकाइपिंसं सदां छता छता त्वह चिनाजुइ । थःगु हे न्ह्यःने दुगु ज्या यायेत तकं थाकु चाइ । भचा चिकुसे च्वंसां थौं तसकं चिकु, ताःलाया इलय् अतिकं तांन्वः । बहनी जूसा थौं बहनी जुल, ज्या याये मखुत धया जुइ । सुथ न्हापां नं ज्या याइ ला धकाः ज्या मयासें च्वनी । प्वाः भचा खालि जूसा तसकं नयेपित्यात धकाः ज्या छखे तइ । प्वाः जाःसा थौं भचा आपा नया नयागु क्वलातकि जक ज्या याये धइगु मतिइ तयाः सुम्क च्वनी ।
प्रगति यायेगु मनू उद्योग जुइमाः । सदां उत्साहित व जागरुक जुयाः न्ह्यायेमाः । अलसि पहलं गबलें प्रगति याये फइमखु। थुकिं भोग सम्पत्ति मुनेगु ला गन दुगु नापं नास याना बी । उकिं तथागत बुद्धं धयाबिज्याःगु दु – गनं सुरापान याइम्ह पासा दइ । गनं न्ह्यःने जक ठीक याना जुइम्ह पासा दइ । तर थःयात आपत् जुइगु इलय् गुम्हेसिनं ग्वाहालि याइ । व हे भिंम्ह पासा खः । ताःई तक द्यनीम्ह । शत्रु आपाः दुम्ह अनर्थकारी पासा खः । मभिंम्ह पासाया संगत याइम्ह सदां दुःख सी । व थुगु लोकय् जक परलोकय् तकं दुःखी जुइ ।
स्त्री धूर्त, सुरा धूर्त प्याखं स्वःजुइम्ह म्ये जक न्याना जुइम्ह । न्हिनय् द्यनीम्ह । कुबेलाय् चाःहिउ जुइम्ह मभिंम्ह पासा खः । थुकिं विनास याइ । जू म्हितीम्ह । सुरापान याइम्ह । परस्त्री गमन याइम्ह । नीच पुरुषया संगत याइम्ह । पण्डितया संगत मयाइम्ह मनू कालपक्षया चन्द्रमा थें खः । निर्धन जूसां सुरापान याइम्ह । सुरापानया कारणं खराब संगत याइम्ह । वं हितिं लः वये थें त्यासा काइ । थुकिं यानाः किपा वयात दुःखी याइ । म्हिनय् द्यनीम्ह चान्हय् मद्यंसे नशाय् मक्ख जुया च्वनीम्ह नाप गृहस्थी जीवन हने फइमखु। तसकं चिकु तसकं तांन्व । तसकं लिबाय् धुंकल धया, थःगु ज्याखँ त्वःतीम्ह मनूया धन नोक्सान जुइ । गुम्हेसिनं चिकु व तांन्वया इलय् तकं विचलित मजुसे ज्याखं याइ । वं सुख प्राप्त याइ ।
मुर्खं भोग निाश यायेगु ज्याखं याइ । थुकिं यानाः वया भविष्य स्यनी । उकिं धम्मपदय् नं धयातःगु – मूर्खया बुद्धि अनर्थ जुइ । मूर्खं थःगु मुर्खताया कारणं थःगु सुख जुइगु भविष्ययात थःगु छ्यं तछ्याये थें स्यंकी ।
LEAVE YOUR COMMENTS