मम्मी धिनां मां मंत, ड्याडी धिनां बाः मंत…..

सुभद्रा मानन्धर

यु ट्युबय् छय्या निंतिं नेवाः मचा म्येँ माला स्वयाबलय् मचा म्येँमध्ये ‘लोहं दाया खौ दाया धाः मंत, म्हासुम्ह झंगः हाः मंत’ धाःगु म्यें जिगु नुगलय् तसकं दित । थ्व म्येँय् छगू हरफय् ‘मम्मी धिनां मां मंत, ड्याडी धिनां बाः मंत’ धयातःगु दु । थ्व म्येँ न्यँन्यं वनाबलय् मांबाः जक मखु, नेवाःतय् द्यः नं मंत धइथें झसंग वन ।

म्येँ न्यँन्यं नुगः खुल्ल मिन । थथे थ्व म्येँ न्यनाः नुगः खुल्ल मिंगु थनिं निदँ न्ह्यव खः । अय्नं छुं नं याये धाःसा फुगु मखु । नेवाः भाय् तना वनी, न्हना वनी धइगु चिन्ता दुपिंत ई चूलाइबलय् वा गनं नाप लात धाःसा नेवाःतय् द्यःया नां तना वना च्वन धकाः धायेगु याना ।

अले थःगु मन नं भचा याउँथें च्वनीगु ! ‘नेपालभाषा टाइम्स’ य् पौ च्वयादीत इनाप धाःगु खनाबलय् नापं नीलः भाजुं नेपालभाषा छुं च्वयादिसँ धकाः इनाप यानादीवं थौं जिं थ्व नुगलय् मन्ह्यंगु खँ प्वंकेगु लँपु लुया वःगु तायेकाच्वना । च्वसा न्ह्याकेगु मन जुल ।न्हापा न्हापा मचाबलय् नखःचखःबलय् बाज्या अजिपिंसं पुजाभः ज्वनाः पीगं पतिकं पुजा यायेत ब्वना यंकीबलय् व द्यःपिनिगु बाखं नं कनेगु याइ ।

अथे यक्व बाखंमध्ये ‘लुँमधि अजिमा द्यः’ छाय् धयातःगु धकाः नं कनेगु याइ । जिमित कनातःगु बाखंकथं छम्ह गरिबम्ह च्वलेजवाः च्वलेचा ज्वःवंबलय् वया माम्हं न्हिनय् नयेत बजिया पलेसा दुसि मरि छपा कापतय् प्वःचिनाः बियाछ्वःगु जुयाच्वन । च्वले जः वःम्ह मचाख्यलय् थ्यंकाः मरि प्वः थः नापसं तयाः न्हिछियंकं धइथें च्वलेचा पियाच्वन ।

च्वलेजवाः मचाया नये पित्यायेवं बजि नयेगु इलय् माम्हं बियाहःगु व हे दुसि मरि नयेत कापः फ्यना स्वःबलय् मरि ला छकुचा नं मदु । सुनानं खुयाः नल धायेत मेपिं अन सुं हे मदु । च्वलेजवाः मचाया तसकं नुगः स्यात । नुगः मछिंकाः ह्वाँय्ह्वाँय् ख्वल । ख्वख्वं वं विरह खं प्वंकल ।

जि गरिबया बजि ला नये मखं मखं, मामं माया यानाः नये पित्याइबलय् न धकाः बियाहःगु दुसि मरि छपा नं सुनां नया बिउगु जुइ …… ! जि नये मखंम्ह गरिबयागु हे नये माःला ? जितः गुलि नये पित्यायेधुंकल का …… ’ ख्वख्वं च्वलेजवाः मचाया म्हुतु गना वन । जुजुं ख्वयेतक नं मफया वन ।

न्हापा न्हापा नेवाःत लुँमरि द्यःयाथाय् पुजा वनेगु धाइ । सुनानं भद्रकाली द्यःयाथाय् वनेगु धकाः धाइ मखु । थथे धायेगु
नं मयाः । अजिमा द्यः गथे जुयाः भद्रकाली जूवन ?

घौपलख सुम्क च्वने धुंकाः छेँय् लिहां वयेगु मन जुल । च्वलेचात दक्व मुनाः मरि प्वः चिनाहःगु खालीगु कापः ज्वंबलय् झ्यातु ताल । खाली कापः नं गथे झ्यातुगु जुइ धकाः व मचां कापः फ्यना स्वःबलय् उकी दुसि मरिया पलेसा लुँया मरि खनाः अजू चाल । छेँय् थ्यंकाः मांयात जूगु दक्वं खँ कन । लुँमरि नं मांयात क्यन । मांम्ह तसकं अजू चाल ।

दुसि मरि लुँमरि जूगु थाय् स्वयेत मांम्ह थः कायनापं ख्यलय् थ्यंकः वन । सुनसान ख्यलय् छगः ल्वहं दुथाय् कायम्हं लुँमरि लूगु थाय् क्यन । द्यवं जकं मरिया पलेसा लुँ याये फइ धइगु तायेकाः व ल्वहंयात हे द्यः भाःपियाः क्षमा फ्वन । लुँमरि लुया वःगु थासय् हे द्यः माने यायेगु मनंतुनाः व हे मरि मियाः लुँमरि अजिमा पलिस्था यायेगु बचं बियाः याकनं हे लुँमरि अजिमा द्यः प्रतिस्थापन याःगु धकाः धयातःगु जुल ।

न्हापा न्हापा नेवाःत लुँमरि द्यःयाथाय् पुजा वनेगु धाइ । सुनानं भद्रकाली द्यःयाथाय् वनेगु धकाः धाइ मखु । थथे धायेगु नं मयाः । अजिमा द्यः गथे जुयाः भद्रकाली जूवन ? नेवाःतय्सं अजिमा द्यः त्वाःपतिकं, गां पतिकं व गुँ पतिकं छगू छगू नामं पलिस्था यानातःगु खनेदु ।
न्हापा न्हापा नेवाःतय् तःधंगु आस्थाा व विश्वासया तःधंम्ह द्यः धइगु हे अजिमा द्यः थें च्वं ।

उकिं स्वनिगः दुने यक्व हे थासय् अजिमा द्यः पलिस्था यानातःगु दु । आपालं द्यःपिनिगु नां थौं हिला वनेधुंकूगु दु । गथेकि लुँमरि अजिमायात भद्रकाली, कंग अजिमायात कंकेश्वरी, लुँति अजिमायात इन्द्रायणी, न्यत अजिमायात नरदेवी, म्हय्पि अजिमा द्यःयात योगाम्बर धाःथें मय्ति अजिमा, पोर्पा अजिमायात नं छु छु नां तयाः यंकीगु खः मसिउ ।

अथे हे वंघः आजुद्यःया थासय् आकाश भैरव जूवन, पचली भैलःद्यःया थासय् पचली भैरव जूवन । कालभैरव द्यःयात नं थौंकन्हय् कालभैरव जक धायेगु याः । धाथें द्यः धइगु नांया आखःग्वः हे तना वनाच्वन । द्यःनापं द्यःया भक्ति नं तनाच्वंगु दु । अले अधिकार अधिकार धकाः जक हालाच्वनां छु याये । उकिया छु अर्थ । जबकि थःगु कर्तव्य हे ल्वःमंका वन धाःसा ।