स्वयम्भू वार्ता

येँ महानगरपालिकां थःगु वडा १५ स्थित स्वयम्भू महाचैत्य लागाया पूर्वी किनाराय् च्वंगु ख्यःयात पुलांगु पलेस्वां पुखूयात नं घाकाः छगू आकर्षक पार्क दयेकेगु ज्याझ्वः न्ह्याकाच्वंगु दु । थुकिया निंतिं माःगु ठेक्का बन्दोबस्त नं जुल धकाः छपाः होर्डिङ बोर्ड नं अन खायातःगु दु । विज्ञापन कथं । तर, थुगु पार्कया स्वरुप गथे जुइगु खः ? थुकिया नक्सांकन धाःसा पित बिउगु खने मदु ।

थुगु पार्क निर्माण जुइगु थासय् न्हापा न्हापाया सांस्कृतिक संरचना छु गथे खः धयागु खँ गनं चर्चाय् वयाच्वंगु नं थौंकन्हय् खनेमदु । थुकिं यानाः स्वयम्भू पुजारी खलःया ज्येष्ठतम दुजःमध्ये छम्ह बाबुराजा बुद्धाचार्यं थःगु दुःख प्वंकेगु यानाच्वनादीगु दु । थुगु थासय् न्हापा अक्ष्योभ्य तथागतया नां क्वकयाः अक्ष्योभ्य तीर्थ स्थापित जुयाच्वंगु धइगु वय्कःया धापू दु ।

‘थन न्हापा ल्वहंहिति घधाः हायाच्वंगु नं खः । थ्व हितिया लः अन्त्यया अवस्थाय् थ्यंकाः थन हइपिं मनूतय्त त्वंकेगु ज्या नं जू । थ्व अक्ष्योभ्य तीर्थय् सत्वपुजा न्यायेका वयाच्वंगु ला जिं गुलिखे खनागु दु । लिपा २०१५–१६ सालपाखे थ्व हितियात ल्हानाछ्वःगु नं जिं हे खनागु दु ।’, वय्कलं कनादिल ।

उकिं थुगु पार्कया निर्माणया झ्वलय् न्हापाया अक्ष्योभ्य तीर्थ कुण्ड दयेकाः ल्हानाच्वंगु ल्वहंहिति हे उकास यानाः क्यनेमाःगु खँ वय्कलं धयादीगु दु । थुकिं पुलांगु अक्ष्योभ्य तीर्थया नं पुनरुद्धार जुइ धकाः वय्कलं धयादीगु खँ थन महानगरपालिकाया मेयर, सरोकारवाला निकाय, योजनाकार भाजुपिनिगु ध्यानाकर्षण यानाच्वना ।

थ्व अक्ष्योभ्य तीर्थया पश्चिमस्थित कर्कोटक नाग (घोरी नाग)स्थान ला थौंकन्हय् नं सुरक्षित हे जुयाच्वंगु दु । थ्वया नं पश्चिमपाखे कुनय् स्वयम्भू गुँया सिथय् न्हापांनिसें छगः बुँगाः चालु जुयाच्वंगु ला थनया स्थानीयवासिन्दा आपाःसिनं खंगु हे दइ । आः थ्व बुँगाःचाय् ः सुना वनेधुंकूगु दुसा थुकियात नं जिर्णोद्वार यानाः पुनस्र्थापित यायेमाःगु खनेदु ।

थज्याःगु ज्यां नेपाःया बौद्ध धर्मय् पंचबुद्ध तथागतया सैद्धान्तिक अथवा दर्शनपक्ष नं झीसं अध्ययन यानाः हे न्ह्यानाच्वनागु अवस्था ला दुगु हे खत । उकिं थ्व बुँगाः अक्ष्योभ्य तथागतया शक्तिकथं आग्नेय कोणय् लाकाः जलधातुया प्रतीक मामकी ताराकथं थ्व हे बुँगाःयात नाला वयाच्वंगु खँ स्वयम्भू परिक्रमाया सैद्धान्तिक झ्वलय् झीसं ल्वःमंके मजिउगु खँ बाबुराजा बुद्धाचार्यं कनादीगु दु ।

सम्बन्धित बुखँ

LEAVE YOUR COMMENTS